Kaca puniki kavalidasi
1.36 GEGURITAN DUKUH SULADRI
Puh Ginada
- Ne mangkin malih tuturan, ring padukuang Tamanbali, dane dukuh lanang wadon, tan kadi kenak ring kayun, nyingak sang wus kaantenang, Nilawati, matemu ring Mertajiwa.
- Asih lulut makurenan, rerad-rerod sareng kalih, arang pisan mabelasan, magarapan saling tulung, saru demene macanda, sareng kalih, di prantenan di pabianan.
- Sagat-sigit maguyonan, swabawane kecut kuning, antuk kerenge magadang, sabran wengi saling rumrum, nyepukang cumbwanarasa, reh sotaning, kantun anyar pangantenan.
- Nging tan lali ring gegaman, semengan pradang matangi, Mertajiwa ka pabianan, Nilawati masesapuh, ring natar rauh ka sanggah, praya gati, kedas bersih kasampatang.
- Yadin mauruk masastra, kantun temes sareng kalih, sabran nunas warah-warah, jemet tangkil ring sang guru, nunasang daging agama, patut indik, pamargi kengin Grikasta.
- Kala wengi wus majengan, rarem medek jeng Sang Yogi, ring pamrajan mangunjakang, suksman sadaging tutur, Dukuh istri masarengan, Nilawati, mas anding ring Mertajiwa.
- Made Wati manunasang, ring dane anake lingsir, indik katatwan Triguna, punapi munggwing sesuduk, Yogiswara mangandika, "Kene Cening, padingehang apang melah.
- Sabinan madan Trikaya, ada Triguna kadanin, binacakan telung soroh, paksan budine tetelu, Budi-Satwan Budi Rajah, bin abesik, Budi-Tamah bina paksa.
- Budi Satwam yan ta kocap, mungguh sajeroning Budi, palinggaan Sanghyang Dharma, kadarmane suba putus, langgeng tan kataman mala, lintang suci, ngamanggehang Buda paksa.
- Budi Rajah kama paksa, cumbwanakrama kapandi, kawit metuing indria, namtamin idep ulangun, awanan dadi gegodan,
115
