Kaca puniki kavalidasi
111
- gar tumbak.
- "Dijaa I Linggapeta, bakal alih nene jani, asing genah nyane nongos, yennya tepuk bakal sia, bes wanen I Linggapeta, nene jani, masa buung iba bangka.
- Kulkule jani enggalang, tunden ngebug apang gati, tedunang brayane onyang, apang ia pada tau, kulkule bulus ngudedeng, tedun sami, wong dewa ada krobelah.
- Pada ia masikep tumbak, tulup kalawan jempiring, sami pada aganggo-anggo, Maudeng kalawan baju, teka pada ring prapatan, sami ngingkis, pada mangagem masiat.
- Sikepe endeh nganginang, tukad Bedahe kaungsi, kapanggih I Linggapeta, matakon munyine alus, "Beli Nyoman anak ngudiang, sada gati, samian mangaba tumbak".
- Ne takonina angucap, "Beli mangendehang cai, kocap cai mamrekosa, Ni Ketut Layang ne bau," I Linggapeta angucap, "Inggih Beli, titiangy tan wenten manawang".
- Nang Ni Ketut Layang teka, mangaprak lantas manuding, "Ne ko iba Linggapeta, wanen ibane bes langkung, bikase mangodag-ngodag, teken kai, laut katebahang tumbak".
- Malaib I Linggapeta, nganginang lampahe gelis, sikepe tadangin encol, ngebah tumbak nyane bulus, I Linggapeta mangajanang, ia malaib, sikepe ba daja nyarang.
- Malih mawali manglodang, uli ba delod nujahin, nanag Ni Ketute nyagnyag, mabriuk ia uli kauh, I Linggapeta mang lawan, manembungin, antuk keris lan urangka.
- Katempong uli ba daja, katumbak uli di arep, len uli samping manonjok, uli di arep manyunduk, ada uli ba duuran, manimpungin, I Linggapeta wus pejah.
- Bah nyane manungkayak, suryake mawanti-wanti, bon getihe maimpungan, miyike mangalub-alub, surya kekalangan teja, ujan riris, prabawan I Linggapeta.
- Atmane I Linggapeta, di dalem kari anangis, ngasih-asih masambatan, kangen maring gustinipun, "Dewa Ratu gustin titiang, kari ngiring, nyeneng nyakrawati jagat".