Kaca puniki kavalidasi
104
- Pustakan Ida Hyang Siwa, manyeleg teked ka langit, Hyang Brahma ngalih menekan, Hyang Wisnu mangalih tuun, kayang jani twara bakat, sangkan kari, toyane ngulah nuunang.
- Apine ngulah menekan, keto satuannyane yukti, eda nyai sumbar-sumbar, sukeh ngalih ane patut, tingkah kadi ngalih saang, mameselin, lamun ingane mangaba.
- Nyai kelih suba nyandang, demenin anak muani, eda kuda cecelodoh, manuukin demen kayun, apang bedik paselselang, teken Nyai, liatin pedas-pedasang.
- Lamun bogbog pete doang, sai ngutang-ngutang munyi, kadang warga liu nyelselang, braya gila ia satuuk, tani demen mametaang, to impasin, puarannyane twara melah.
- Ngelah pianak dadi pejah, enu cenik-cenik mati, ne numadi tan pabea, dadi idup tani mampuh, bingung punyah mapitungan, tuyuh sai, awak koos tuna pangan.
- Ento kelidang ingetang, pedasang pisan ngiwasin, eda ngulah demen dogen, wekasane masih itung, palan jelene di awak, bilih dadi, ne suba kawon impasang.
- Bapa ngastitiang awak, palannyane teken nyai, Bapa mapi manurutang, darma patute tuah tiru, apang eda ke ingetang, suluh ati, kenehang darmane saja.
- Anak liu ngobah-obah, tong dadi Bapa yukti, darmane kalahang kroda, ane pelih dadi patut, tutur Bapane manungkak, mabar api, masih panes iusin.
- Bapa tresna peta doang, ane puyung katon misi, ane bedik katon katah, paling Bapa patikacuh, sangkan kene tiwas ngurag, sai-sai, ngenehang darmane jumah.
- Bapa ngastitiang tapa, palannyane teken nyai, Bapa ngastitiang darma, patuting sastrane tinut, Bapa tiwas twara pada, tan pamelik, suka Dewa ngampura".