Kaca puniki kavalidasi
101
- Kang atma maatur sembah, kapiat-kepiut sada asrih, "Inggih wiakti ipun Dewa, mangkin titiang naen sisip," atmane matur sami, "Ne mangkin Dewa pukulun, titiang nunas supatan," Hyang Panyarikan nyaurin, "Tuduh ugug, kudiang awak kadong salah.
- Dong ta emasin taanang, atmane paslegut ngeling, ngres jejeh atine liwat, ngrasa awak jani sakit, nyumbah-nyumbah mamunyi, "Titiang mindah dewa ratu, wit titiang kapok pisan, pungkur wantah titiang malih, jaga murug, ngambekang laksana corah.
- Sara enak pakayunan," Hyang Panyarikan nyaurin, "Ene apang iba nawang, para atmane mamargi, di anduse makilit, manyeleg gede malugpug, apine murub ngabar, tongos atma malablabin, sing macebur, anyong gebuh pataladtad.
- Enden te malu antiang, iba kema manyeburin, di jambangane malablab," saliun atma pada sedih, maguyang ngulun ngelung, "aduh Bapa aduh Ibu, sigsigan matur nyumbah, atiban titiang sengkerin, kalih taun, apang gigisan manraka.
- Tigang tiban titiang nyandang, usan nika glisang angkid, icen titiang lelepasan, manyampura usan sisip, mangda usan nandangin, sangsara satunggun tuuh, sampun ja ngicen embon, bantas sumedah tiwakin, dadi muwus, Hyang Panyarikan manimbal.
- "Lamun ada panebasan, nista madiotama indik, ia dadi sadarana, dasamalane tepukin," Kang atma matur sami, "pinunas titiange Ratu, tiang nenten ngaba jinah, pungkur titiang naur sami, misti Ratu, apang manikel ping satak.
- Titiang ngaturang panebas, "Hyang Panyarikan nyaurin, "Tusing ada krama keto, apang ngiring Sang Hyang Widi, tong dadi owah-owih, suba ada jangkanipun, di gidate masurat, jele melah katakenin, suba mungguh, tong dadi obah pelihang.
- Pagaene suba-suba," atma paraatmane sedih, nguntuk kange awak, yeh mnatane ngelek mijil, paslegut matur ngeling, "Titiang naweg pisan ratu, titiang nunas lungsuran,
