Kaca puniki kavalidasi
98
- mentik, pakocapannyane ilu, tiing kadaden wadah, papagan anake mati, dadi idup, samah tur lingseh-lingsehan.
- Ada malih ngenah pandan, bek ategal atub wilis, yen ento reko kocapanya, pecak tikeh anak mati, dini buin idup mentik, endut blegada matepuk, dalem banges malekag, pakocapanyane riin, pecak usus, kadaden berekan basang.
- Banyeh anake pejah, atmane liu makrem lecik, bilih rangkung palaksaan, pakesol tong dadi mangkid, mapadang alang tehi, tajep lan lanying rurus-rurus, pacrenggeh bilang dangka, katuturanya ne riin, wantah tuhu, kaden rambut watangan.
- Ebok bangkene makejang, ada atma buin kapanggih, uli kauh nyerit. ngarab, maante gede ban besi, Buta Galungan nigtig, ngapluk ngenggel baan elu, nto reko atma anak, twara da nuur punagi, krana ngelur, kasakitan manggih papa.
- Peteng lemah mangumandang, linyok oraka gede panggih, linyok ring sama manusa, satus taun papaneki, linyok ring sato sami, dasa tahun papanipun, linyok ring sang pandita, nraka luir paembah warih, twara suud, boya lukat saking nraka.
- Pan ida rumaga Dewa, atma tan pacucu malih, sakit magantung nglelayak, di tiing petunge aking, nglayut ampehang angin, mairib don kayu etuh, ngeling di duur sawat, len ada atma kapanggih, payah etuh, kari kulit ngaput tulang.
- Sipe buku beseh barak, salah nulak dana panggih, wenten malih katon atma, makaronan luh-muani, sarat nyuhun mangundit, manyangkil gedong mangadut, jeeng ngaba kasuguhan, ento atma sugih demit, pedih nulus, nganggo gelah tani logas.
- Mayasa madana punia, Bagus Diarsa adeng mangkin, sada mangratu majaalan, saget ada ngenah malih, Kahyangan Sanghyang Buri, macandi putih mangungkul, makayon kayu teja, graha slaka ringgit, sayan tuyuh, I bagus Diarsa mamarga.
