Kaca puniki kavalidasi
97
- Mangeling nagih tulungin, biyur pada saling tigtig, gegawane sambeh nampias, ne labuh ento rebutin, mangesop nyegseg bibih, lenlenan celekat-celekut, dane I Bagus Diarsa, kangen mangatenang jani, wetu sungsut, dadi inget eken awak.
- Yeh matane patambuawas, buin atma magantung kapanggih, di kepuhe pinah serak, batannyane misi api, to atma lintang sisip, misuna mangadu-adu, ada buin katon atma, kepung celeng asu sampi, galak ngutgut, kagimel makoyayangan.
- Matatu ngeling mangengkak, salah tong nawang sastraji, purwa tingkah dadi janma, tan pangitung linging aji, sai mungpang pamargi, patuh pasah teken pasu, ada malih ngenah atma, bonyok ledoh cokcok paksi, sitsit renyah, muncar getihe sumirat.
- Tatume dekdek ngaranjang, salah belog pengkung jail, loba mangulahang awak, apang suka padidiin, buin lea atma kapangguh, pagrudug pada macelep, di song batu.
- Matane malontod medal, salah pengkung gedeg sai, jendel tani serdah manah, kurang somla lewih brangti, tan ngiring sastra aji, patikepag-patikepug, teleb puik gedeg nyabran, kene palanya tepukin, patipurug, malih ada ngenah atma.
- Ne malablab di jambangan, mluab ngredeg kapunpunin, antuk watek jembala, pada girang manujuhin, ban sangkut tulud besi, majepit ngeliag mangaduh, to atmane dursila, ambek sapa kadi kami, sai bijul, mamrih kapatiang roang.
- Kirang taros lewih kroda, Bagus Diarsa kinceh mirmir, ngenot watek soroh papa, sambil majalan neringding, ngangseh sisu mamargi, kendel bane ada turut, panugrahan anak odah, tejane muncar ring langit, pada takut, Cakrabalane mamapas.
- Pada nyamping tan wikara, sayan doh olih mamargi, masih enu manganginang, sagetan katepuk tiing, ategal samah
