30
17a 190. Sang Prabhu alus ngandika, lega ira Patih maplayan Belibis, kaget rauh Raden Galuh, jegege buka gambar, wus mapayas, masemi mapahyas alus, macacunduk bunga pudak, maselag ban pucuk anggris.
191. Sarauhe raris nyembah, nunas lugra Sang Belibis ngliyatin, dekdek enyag buka lulur, kenehe mangentenang, tuah waluya, buka nene mati malu, macebur uli di tinggan, baya tuah dini numitis.
192. Sang Prabhu raris ngandika, dini nanak galuh negak masanding, Sang Belibis matur alus, munggah ratu munggahan, titiang nunas, lugra matur saking duur, rahaden Galuh munggahang, kacingak I Belibis putih.
193. Raden Galuh buka atat, seneng pisan nyingakin Sang Belibis, kenyuhin antuk Sang Prabhu, Raden Galuh mamitang, kagenahang, di pangkone kurut-kurut, sang Belibis pisan, manyiksik susune nyangkih.
194. Raden Dewi cara macanda, I Belibis dija jua umah cai, Sang Belibis raris matur, titiang Belibis raja, ring Malawa, pagenahan titiang ratu, titiang ke anggen Cokorda, antuk Belibis sami.
195. Sang Prabhu gawok mirengang, antuk teteh Belibis mamunyi, dadi masih bakat ejuk, tuah ganti baya titah, dini nongos, dadi playan Nanak Galuh, Raden Galuh matur nyumbah, titiang mamitang I Belibis.
196. Sang Prabhu ngandika juang, nanging keto dewa masih apikin, dija ngalih Belibis tulus, bisa mamunyi janma, uling malu, sing ja taen ortan ipun, pisan syung curik pekat, ento ke enu jetetin.
197. Nanging masih sawer pisan, tuara kena selar munyine manis, sing bikasange kahyun-hyun, Raden Galuh anembah, wus mapamit, mangemban I Belibis mantuk, wus rauh ring pegaluhan, Rahaden Galuh malinggih.
198. Gawok sawong jro pagalwan, rawing kaka-kakan ira tuan Dewi, ngenot I Belibis sapangku, kahyun-hyun kalintang,
