25
140. Sira Patih sareng sinamian budal, kenehe sebet gati, pada teked jumah, tong ada pawilangan, sira Demang teka melinggih, sebenge sawat, tuara buka ne ibi.
141. Nini Ugi manyagjag gelu manyingak, rabine sebet ati, manglaut nakonang, Gusti ene kenapa, sebenge tuara da pati, ortane tiang, apa makada Gusti.
142. Sira Demung masaur apa lacur san, ganti jengah tepukin, tong dadi pelihang, nanging ajak makejang, timpal tiang manepukin, makadi Ida Sang Prabhu, sebet gati.
143. Sang Belibis miragi taler manyagjagin, nyesedang manakenang, kenken sih awanan, dados sebete lintang, sira Demung mangortain, kene kandannya, wiku marebut istri.
144. Pada ngaku madue rabine Ida, ne istri tuara uning, yen ngken rakan Ida, ban wamane waluya, patuh mairib abesik, ento itunian, nunas manda rawosin.
13a 145. Sang Prabhu naneng emeng pisan minehang, pangandikane tiding, teken Mantri Ida, asing tuara nyidayang, kasuudang ngisi gumi, asing nyidayang, ngrawosin madeg patih.
146. Sang Belibis kenyem manis laut nimbal, Bapa Demung ne mangkin, mrika ka bancingah, rawosin pragatang, olah nyipatin puniki, gentosan Bapa, pacang mangadeg patih.
147. Nika Ida sang wiku ne patuh warna, ipun Bhuta asiki, niki anggen megat, pawicarane lasya, asing nyidayang, nyelupin, esong caratan, nika sanggupang polih.
148. Kalih mangkin ndikayang nugdugang saang, tunjel mangdennya ngendih, asing manyidayang, nyelupin esong caratan, daglang di apine ngendih, ne tan nyidayang, aturin Ida Istri.
149. Sira Demung lega bau miragiang, raose sang Belibis, pramangkin majalan, tandange megamparan, teked di bancingah gelis, depetang atap, para Mantrine malinggih.
150. Nanging Ida Sang Prabhu durung kawedal, sira Demung mamunyi, sapunapi pada, Bali careng samian, nyidayang pacang megatin, niki Pranda, lesu sue malinggih.
