"Selamet tinggal Inaq, Mamiq. Dumadak apang matemu malih," kenten aturne Gusti Ngurah saha menek ka montore ane magerus majalan ninggal umahne sayan sepi. Di montore Lalu Wiradana ajak kurenanne nuturin adinne apang ten pedih teken reramanne. Yen jakti lakar nganten melahan sampun kalahin merarik, apang ten masih ngarepotin lan nyengahin mamiq. Yapin sujatinne raganne masih sebet, nanging yen sampun ane lakar nyalanin mamengkung lakar kujang? Pada ngelah pamatut, hak azasi manusia cara mangkine. Gusti Ngurah matur suksma, nanging adinne ngeling sigsigan. Teked di Praya Gusti Ngurah lan Lale Dumilah ten buin singgah. Uli penambangan raganne terus ngalih montor ane lakar ka Cakranegara. Belinne terus mapagin panakne.
Alon-alon buse pesu uli penambangan lantas nyelehseh di margane ane bek misi buk macampur tain jaran. Panese beeng ngentak-entak. Paceretcet peluh panumpange pada maseksek. Lale Dumilah nyeleleg di dadanne Gusti Ngurah mapi-mapi kiap, lantas makakeb di pabinanne. Jam dua montore sampun teked di penambangan Cakrane.
"Denda Milah, bangun he. Ne suba teked jumah," kenten Gusti Ngurah mecik cunguh gelanne. Maka dadua lantas tuun nadtad bandanne suang-suang ka Jerukmanis. Dapetanga Pan Kobar, Wayan Rempuh, lan Made Sinar sedeng negak di ampike ngisis.
"Beh, selidan ja sampun rauh Tu Ngurah. Sapunapi pikolihne masewaka. Tulus napi sebetanga antuk reramanne Lale Dumilah," kenten Wayan Rempuh mataken aris.
"Beeh, saja berat Mek. Tiang ten payu morahan teken reramanne. Belinne sampun nyelehin nanging sulit rasanne maang pajalan papadikan. Pajalan adate sukil, apang ten ngawe jengah di pakramane," kenten Gusti Ngurah masebeng sendu.
35
