akhirat. Bangken inaq lan mamiqne yen mati mani utawi buin puan tusing lakar tepukin cening." Mamiqne manteg paha sedih macampur duhkita. Gusti Ayu Sasih masih merasa pelih, tuara nyadin yen raosne mara ngawe Lale Dumilah ngambul tur bani ngomong buka kenten.
"Inaq, Mamiq, sampunang ja guguna raosne Adik Milah. la kari bingung timpalne makejang sambeh. Yen pidan ia maan timpal sinah suud sedih," kenten Ayu Sasih nyapsapang matuanne. Gusti Ngurah lan Lalu Wiradana teka ngumbah tanganne momos suud menahin montorne. Lale Dumilah enggal ngusap yeh paningalanne aji saputangan.
"Nah, mungpung suba tengari, melahan malu bareng madaar," kenten inaqne lantas ngamaluin ka paon tutuga teken panak lan mantunne. Mamiqne nampedang biune wadahina kampil. Sampun kenten lantas ka kamar makan negak ngiter meja madaar nganti pada wareg. Lega pesan inaqne ningalin mantu lan panakne pada pakremos. Napi buin Gusti Ngurah tuara merasa eiek mimbuh nasi lan dengdeng kaoke sasenenganne.
"Ah, Inaq demen gati. Gusti Ngurah ten kimud kayun ngajengang deriki."
"Nguda tiang kimud. Keneh tiange patuh cara jumah wak tiange Pan Kobar di Cakra. Yapin tiang nunas nasi asopan, masih patuh cara nunas nasi awaregan. Adanne masih tetep nunas pang sapisanan," kenten pasautne Gusti Ngurah ngawe lega Inaq Wira. Sasampune pada suud madaar Lalu Wiradana ngajakin matulak, lakar mapagin panakne. Mamiq lan inaqne menpenang biu lan dengdeng a sokasi anggon gapgapan.
"Nah kanggoang malu pipis saadanne," kenten raosne Inaq Wira ngenjuhin Lale Dumilah pipis. Makejang mangkin pada masalaman angayubagia apang selamet di jalan.
