"Aaah ....., rasanne tiang emed kuliah ...., ngantiang buin 4-5 tahun mara tamat. Adenan cara Luh Purnama, magae. Apang enggalan nganten. Yadiapin dadi sarjana masih lakar dadi ibu, ngurus paon ajak panak," kenten Lale Dumilah nyeplos gregetan. Belinne gelu ningehang, lantas ngejepin adinne tur ngaukin Gusti Ngurah Darsana.
"Dik Ngurah meriki jebos cingak akin montore miribne swak." Ajaka dadua lantas kamontore. Derika raganne ngorahin apang Gusti Ngurah ten ngorahang indik rencananne lakar nganten. Bale dangin Lale Dumilah tuturina teken mamiq lan inaqne.
"Nguda Denda keto, mamiq enu nyidang meanin cening kuliah. Yen sing keto beline masih tusing lakar ngadepin. Sing keto ning Ayu Sasih?" kenten raos mamiqne.
'Yen saja cening nagih enggal nganten, apa suba ngelah tetagon? Kanggoang ja misane lamun keto. Kaden ia suba lakar tamat kuliahne." inaqne masih nyugjugin.
"Beeh, Inaq jag satata netehang awak tiange apang ngenyakin batur sadulur doang mara tiang luh. Kaden inaq mepes nuturin yen indik lekad, mati Ian jodoh mula tuah takdir Gusti Allah ane kuasa. Buktine Bli Wira ajak Mbok Ayu. Salah-salah yaning inaq bas sanget mapilih ngalihang tiang kurenan, melahan sapihang, tan bina cara Putri Mandalika Nyale," kenten Lale Dumilah masaut. Gusti Ayu Sasih makenyem nyeledetin.
"Ooh Denda, Denda Milah. Dendik nganti marak meno Denda. Ila ila ngomong buka keto. Anake tua netehang apang panakne sida nemu ane melah, ane rahayu. Apang tusing masih ngawe reramane jengah teken nyama brayane," pitutur mamiqne alon.
"Sujatinne nyen demenin Denda, Gusti Ngurah? Ah, seken ene? Oh, nenek kaji sak kuasa. Dadinne Denda lakar ngalahin rerama dunia
33
