Kaca:Gita Ning Nusa Alit.pdf/381

Saking Wikisource
Kaca puniki kavalidasi

sami, taler ke maka sasuluh i rerama, utawi pinaka dasar papineh para
juanane sane jaga nyaluk grehasta," baosne Ida Bagus Aji.

"Inggih, dumadak titiang sida nulad katulusan pitresnane pingit sekadi Gung Ngurah sareng Jro Mekel Ratna Dumilah. Mangda nenten sekadi caritane sedih iriki sane kaalamin antuk penganten sane nenten polih restu saking reramanne, raris nglalu pati nyeburang raga ring jurang Maria, nampek Gunung (Doro) Dria ngantos ngemasin seda makekalih. Jurange punika kawastanin. Jurang panganten manangis. Banggayang sampun pianak titiange kemaon sane padem dados caru, nebus kaiwangan meme bapan ipune," kenten aturne Made Malat lan Dayu Sutresni matungtung tangis.

"Inggih Gung Ngurah, ledangang titiang mapamit dumun. Yen puniki turutang manawi ngantos semeng ten telas caritane. Matur suksma antuk picane magenepan iriki. Utamanne pitutur sane linuih, anggen nyelehin tingkahe salah pinaka suluhing urip," pandikanne Ida bagus Mayun lantas matangi nganjali "Om Shati Shanti Shanti Om."

"Ngiring durusang, "Om Shanti Shanti Shanti Om," Gusti Ngurah lan rabinne ngawales saking tulus manganjali, saha ngatehang tamiunne ngantos ring pamesune.

Wengine nika sabehe riris tedun sayan bales. Katak, dongkang, lan enggunge ramia ngongkek saling sautin. Kamar umah dinese mula akeh, cukup anggen sirep tamiune makesami. Saking lelehne mamontoran durung jam dasa samian sampun pada lelep sirepne. Kari Gusti Ngurah sareng rabinne makisi-kisi angayu bagia santukan inaq lan mamiqne, minekadi ajinne Dayu Sutresni sampun ngampurayang pamarginne budal tan papamit saking tulus lan welas asih. Toyan panonne Ratna Dumilah maseleet ngetel di dadanne, kakecup olih Gusti
Ngurah pinaka tanda bagia. Pelukanne sang kalih sayan tekek, lambene


383