Kaca:Gita Ning Nusa Alit.pdf/38

Saking Wikisource
Kaca puniki kavalidasi

anak malenan Agama, saking jodoh nyak nuut bakti teken rerama. Nanging ajanian mamiq tonden bisa narima, sawireh enu kuliah."

"Nggih dumadak ia dereng ngelah rencana nganti buka kenten. Nanging melah masih sasiliban mamiq nuturin adik Milah apang seleg malajah tur bisa ngaba raganne." Lalu Wiradana lantas ningting biune nutug mamiqne majalan mulih matututan.

"Oh, Mamiq. Kabenengan mangkin tiang maan nunas biu nasak di punya," kenten Lale Dumilah nyagjagin reramanne. Mamiq Wira ngelut panakne saking asih. Gusti Ngurah masih milu nyalamin. Mara matolihan kejepina taken Lalu Wiradana.

"Nak Gusti kocap lakar pindah. Pidan lunga, napi langsung uli deriki napi budal ka Bali malu? Enggih dong ajeng wedange" kenten Mamiq Wira netesang.

"Nggih Mamiq, tiang budal dumun ka Bali. Nika awanan tiang meriki pang polih mapamit sawireh buin limolas dina mangkin apang sampun di Atambua. Tiang nunas doa restu Mamiq lan Inaq sami. Kenten masih tiang nunas pangampura yen wenten kaiwangan tiang ring kulawarga sami deriki, dumadak sida matemu malih."

"Dumadak apang selamet tur sampunang lali ring gumi Sasake."

"Beh Inaq, padalem Denda Milah mangkin ten ada nimpalin malajah. Ipidan ada Gek Sri, Adik Ngurah ane nuntunin sangkal makejang lulus. Mangkin Dik Ngurah masih pindah. Luh Purnama lan Yan Galang sampun magae. Bisa-bisa denda Milah lakar ten seleg malajah." Gusti Ayu Sasih masawang sebet. Lale Dumilah dadi milu pada sedih.

"Nggih, kari ada Made Sinar lan Luh Purnama kari tetep bareng nongos derika. Buina dadi masih ngalih timpal ane cocok yen ........." Gusti Ngurah nerusang alon.

32