Kaca:Gita Ning Nusa Alit.pdf/36

Saking Wikisource
Kaca puniki kavalidasi

Ngurah," kenten belinne nyapsapang adinne kalaran. Teked di Sengkol Lalu Wiradana melokang setir montorne ka kebot lantas macelep ka pekarangane. Ayu Sasih tuun uli montore, nanging Lale Dumilah kari mangsegan sedih.

"He, Denda Milah tuun dong, kaden suba teked jumah di Sengkol?" kenten belinne matuinget adinne. Gusti Ngurah lan Lale Dumilah tuun. Egar pesan inaqne nepukin mantu lan panakne teka. Ayu Sasih ka paon ngaba bungkusane. Lale Dumilah ngelut inaqne ngasih-asih mapi-mapi ngidih pipis.

"Oh,tumben semengan teka Ayu, Wiradana, oh nak Ngurah masih milu. Meriki ja menekan malinggih. Mamiq kari ka tegale ngebah biu ane nasak di punyanne. Denda Milah sing kuliah jani? Inaq rencanane mani lakar ka Cakra sambilang mabelanja."

"Tiang sedeng melaha maan jaga peteng, mangkin libur. Sedeng melah adik teka lantas bareng meriki. Tiang lakar kategale malu nelokin Mamiq," kenten Lalu Wiradana lantas pesu ka rurunge. Inaqne ngajak Gusti Ngurah lan Lale Dumilah makisid negak di teras bale dangine makebat tikeh pandan. Gusti Ayu Sasih ka paon ngaenang teh patpat abana pesu ka terase. Caluh pesan abahne di umah matuanne.

"Ee, Ayu. Kaden di lemarine ada kripik ubi mawadah toples. Jemak ja Milah! Tumben Gusti Ngurah teka tusing ngelah cumi magoreng," kenten Inaqne ngorahin.

"Ah, Inaq ten ada cumi, dengdeng kao masih kanggo." Lale Dumilah nyeledetin Gusti Ngurah lantas ka paon nyemak kripik. Inaq Wira milu kenyem nepukin panakne wawuh ngajak Gusti Ngurah. Ngerti ia teken sasmitan anake ane kasmaran.

"Nah, yen ento tagih cening sujatinne suba pesenang inaq di warunge danginne.. Kabenengan ebene jumah suba telah," kenten

30