kenten Luh Purnama tandruh, sawireh tuara ada hubunganne teken patakonne Yan Galang ibusan.
"Badah, ene mara ya tusing nawang unduk. Sing bisa dadi pengacara utawi pukrul. Ene Denda ane dadi pasakitan sawireh suba ngamaling isin jajeroan cange, hati, jantung, paru-paru kayang tresnan cange palinga. Jani pamidandane kaputus dadi kurenan/rabin cang saumur hidup. Sing dadi belas yadiapin suka, duka, lara, pati yen dadi tunas apang mabarengan ane madan salunglung subayan taka," kenten Gusti Ngurah saha nundikin gelanne ane milu bengong mirengang hukumane ane katiba teken dewekne. Mara raganne ngerti teken ujud pandikanne Gusti Ngurah, lantas mabading ngelut, ngecup gelanne mawanti-wanti. Yan Galang Ian Luh Purnama kedek ngakak.
"Nggih, hukuman katerima. Nanging tiang masih patuh ngukum Tu Ngurah dadi rabin tiange salawase, tusing megatang tresnane kayang kawekas, Swarga nunut neraka katut," kenten Lale Dumilah matadah gugup sawireh Gusti Ngurah sahasa meluk raganne nganti keweh mangkihan. Maka patpat mangkin truna-trunine mesikang limanne masalaman maka cihna pasawitrayane apang nerus tumus salawase.
"Yan Galang, jalan mulih malu. Mani tiang lakar ka Praya ajak Lale Dumilah, apang enggalan cang ajak dadua mabui salawase. Daag, sayang, dumadak apang ngipi ngalih bunga nanging maan bulan ulung di pabinan," kenten Gusti Ngurah saha nandan Yan Galang pesu. Bajang-bajange ngundebang kurinne suang-suang. Trunane maka dadua enggal mulih kumahne nyelibsib ngampakin lawang kamarne lantas masare ngakitang lamunanne suang-suang. Petenge sayan sepi, clepuke makuuk kewerin baan i lelawah.
