main kartu ngajak Yan Galang. Muanne Yan Galang sampun mores kena pupur, nyiriang mepesan ane kalah. Luh Purnama mara kena pupur cunguh lan pipinne.
"Nah, sedeng melaha Lale Dumilah suba teka, jani ada ajak main apang tusing padidi ane kalah. Ayo Denda, Tu Ngurah?" Wayan Galang ngusap-usapin muanne.
"Nyen lakar main. Jani suba jam dasa. Mani Wayan ajak Luh Purnama sepanan masuk. Tiang masih suba kiap, lakar pules," kenten Gusti Ngurah lan Lale Dumilah.
"Bah, yen kenten ampurayang tiang lakar mayasin belin tiange malu apang ten opaka nyanan teked jumah teken Memek," kenten Luh Purnama lantas nyemak spon saha ngalusang papupuranne Yan Galang nganti alus cara pregina gandrung uli Lenek.
"Naaah, ganteng ... ten Tu Ngurah? Yapin kalah, nah baanga upah bedik, kanggoang ..aah, cuaap..... cup, cup cuuup uaah."Luh Purnama ngecup bibih gelanne di arepanne Gusti Ngurah lan Lale Dumilah. Wayan Galang amung bengong cengar-cengir lega. Lale Dumilah dadi milu garegetan lantas mabin, meluk, lan ngecup gelanne.
"Terus Tu Ngurah ajak Denda Milah ngenken makelo gati di kamar i tunian? Napi keputusan rembugane apang sing pocol. Sing maan biji yen amung ngempahang kangen dogen buka kene?" Wayan Galang matakon nyelag, saha ngelut gagelanne ngewerin.
"Ooh. Palu suba maketokang, Malinge suba ka putus hukumane sa umur hidup. Sing dadi menek banding, apa buin matanggeh." Gusti Ngurah nyantep sebengne sada acreng. Luh Purnama lan Yan Galang bengong saling nengneng tuara ngerti napi-napi.
"Putusan apa ento? Maling napi nganti mahukum sa umur hidup?"
21
