Kaca:Gita Ning Nusa Alit.pdf/263

Saking Wikisource
Kaca puniki kavalidasi

duur nganti ka cokor. Sesampune makelo mado'a lantas icena minuman agelas. Salibne anggona ngetok-ngetok gidatne, bibihne, dadanne, weteng nganti teked ka cokorne. Ratna Dumilah mrasa cara ada sinar nyetrum raganne. Sesampune pada malinggih di kamar tamu, Gusti Ngurah mesuang kotak payasane.

"Romo, titenin tiang kurenan tiange nyumunin bingung, gedeg lan uring-uringan tan padasar sasukat nganggon payasane niki. Saking gedegne lantas engsap madaar ane ngawenang ia sakit. Tiang ten uning napi wenten masalah ulian payasane niki Romo?" Atume Gusti Ngurah alon. Romo Ulumondo maliin kotake lantas mesuang payasane seka besik. Periksana, budang badinga saking telaten gati. Pas maliin kalunge, bagiane paling gede cobakina muter sekrupne tau-tau mabukaan lan uli bolongne pesu serbuk kuning ane bonne milk ngalup. Romo enggal natakin serbuke, kumpulanga wadahina kertas apang ten sembur. Romo komat kamit maca doa neropong serbuke nganggon salibne.

"Pak Ngurah, niki tumben tiang ningalin bolonge niki misi serbuk. Yen barang antik cara niki deriki druen kepala suku, utawi anak sugih, biasanne misi besi kuning, besi putih, utawi yen anggoan anak cerik misi kepusan udelne," raosne Romo nerangang.

"Terus mangkin kenkenang serbuke niki?" Patakenne Gusti Ngurah nyujutang.

"Serbuk niki mula keras. Alon-alon bonne nyusup bisa ngawenang sakit kuning tur bayunne sayan makelo sayan enduk. Sajaba nika masih saking kerasne ngawenang basang gedeg, pusing, buduh paling tan pajalaran. Syukur pisan niki gelis katangehan," kenten aturne Romo Ulumondo saha ngaput serbuke rapet-rapet.

"Terus barange niki kenkenang mangkin, napi perlu ulihang utawi adep?"


263