pangelingsirne Lale Dumilah nenten manut, utawi tan ngicen pamargi rerangkatane?" Pan Kober nolih Lale Dumilah.
"Nggih, buin mani tiang lakar ka Praya malu mapiguman ngajak belinne Lale Dumilah. Raganne sinah tatas nawang kenken adat aneke di Sengkol. Utamanne kenken papineh raganne sawireh kurenanne, utawi ipahne Denda Milah nika mula anak Bali uli Tabanan, dadi bidan di RSU Praya mapesengan Gusti Ayu Sasih." Gusti Ngurah masaut nerangang. Made Sinar ngelut Lale Dumilah saking milu merasa bagia.
"Nggih, becik sampun asapunika. Dumadak mangda belinne punika maduwe manah sane adil merasa pateh indike ambil ka ambil, nyidayang mituturin reramanne," kenten aturne Wayan Rempuh marasa bungah.
"Dumadak apang kenten, Mek, Wak. Manian masih Memek lan Wak ane lakar tuyuh ngiring Ibu lan Ajin tiange mapadik. Nanging yen ten baanga mapepadikan, ... ah?" Gusti Ngurah tuara nerusang pandikanne sampun selaga ......
"Tiang jag mapamit sapisan, ... kanggoang tiang merarik nutug Tu Ngurah. Kenken yen kenten Mek?" kenten Lale Dumilah macempleng.
"Naah, nika mara madan tresna sujati, sawireh karma lan jodohe mula Sang Hyang Widi ane nitahang. Nanging patut utsahayang malu apang becik suluranne." Wayan Rempuh matutang. Lale Dumilah bangun lantas mapamit nandan gelanne.
"Mek, tiang mulih malu. Nyanan bas makelo Yan Galang nyagain Luh Pumama jumah." Lale Dumilah lantas pesu tan mari nyigit lengenne Made Sinar "Slamet bubuk Luh Ade, rajin-rajinang malajah." Gusti Ngurah nututin pesu ka rurunge ngatehang Lale Dumilah. Kayun nyane sampun pada rumaket. Teked jumahne dapetanga Luh Purnama kari
