Rempuh lan Pan Kobar saling pandreng pada angayu bagia empu-empuanne sida nemu rahajeng, selamet uli panca baya.
"Mek, Wak, yen Tu Ngurah pindah kenken mirib kuliahne Lale Dumilah. Padalem mara pesan raganne magelanan saget lakar mapalasan," kenten Made Sinar ngarenggeng teken reramanne matadah iri.
"Sukserah jani raganne ajak dadua. Miribne ento ane dadi rembugan sangkala kayang jani tonden pesu uli kamarne. Dumadak apang pada adung, saling ajinin tur nemuang ane madan patut," bapanne masaut, kapatutang teken memenne.
"Yen keto saja pelik. Yen dadi tetehang melahan suba apang dane nganten dogen, katimbang lakar mapalasan saejoh-ejoh gumina" Wayan Rempuh masaut nimbal. Uli diwangan saget macelengus Lale Dumilah lan Gusti Ngurah ka paon. Maka dadua pada sumringah cara tan pabanda lantas milu negak di selaane. Lale Dumilah negak di bangkune masanding ajaka Made Sinar. Gusti Ngurah lantas ngawawanin matari teken Pan Kobar lan Memek Rempuh.
"Wak, buka raos tiange i tuni, tiang mulih meriki lakar morahan mapamit pindah ka Atambua. Galahe sampun mepet pesan. Buina tiang ngajak Lale Dumilah sampun adung lakar nganten malu deriki . Keweh yen tiang mapalasan bas makelo nganti limang tahun.Yadiapin kenkenang tugas tiange ane lakar mepes mapindah-pindah lakar ngewehin pradene Denda Milah maan gagaen, masih milu mapindahpindah dogen. Kanggoang ja tiang dogen ane magae. Yen perlu panyalimur manah anggon sambilan, liu gagaene ane dadi pelajahin jumah," kenten Gusti Ngurah matuturan sada banban.
"Beh, punika kalintang patut Tu Ngurah. Napi malih antosang. Nanging , antuk pamargine sapunapi. Sampun kapineh yen pradene
19
