pamit dumun nggih Bu," pasautne encik Amio lantas pesu tutuga teken timpalne. Ratna Dumilah malihin aba-abaanne misi woh-wohan lan amplop. Woh-wohane tundena Meina ngaba ka meja makan. Amplopne abana teken Ratna Dumilah ka kamarna lantas bukaka.
"Bah, misi pipis limang atus tali rupiah. Gajihne Tu Ngurah dogen tusing a pah limana a bulan. Miribne ene rezekin panake di basang, ada anggon bekel ngalahirang buin dua bulan." Ratna Dumilah lantas nyimpen pipise apang uningina teken rabinne.
"Bu Ratna, enak nggih dadi Kepala Bank? Liu langganane ane ngabaang pipis, oleh-oleh jaja, woh-wohan, kain nganti barang antik. Boss tiange yen turne kadesa-desa mulihne ada dogen geranduta," raosne Meina nyroscos nuturang bossne di Kupang.
"Tiang sing seken nawang ane buka keto. Paling-paling Tu Ngurah ngaba madu kela, dengdeng celeng alasan yen ada timpal tenterane ane maang ngidih. Uling dugase enu di Mataram raganne mula liu ngelah timpal mancing, medil, muah maabianan," kenten raosne Ratna Dumilah saha nyemak jeruk pada mabesik kupasa ajak Meina.
Petengne, dugase pada ngisis di terase suud ngajengang, Ratna Dumilah masadu indik tekanne Cik Kong Amio ngaba woh-wohan lan amplop misi pipis, saha pabesan yen ia kari luas ka Surabaya ngaba barang. Mirib buin aminggu ia mara balik meriki. Gusti Ngurah bengong nyawang rabinne ane papolosan nrima pabaang anak ane tonden seken tawanga kenken arti lan isin gapgapane, saking tulus napi ada pamarihne lenan?
"Tu Ngurah, nguda dadi nyingakin tiang buka kenten? Napi pelih tiang nerima titipan anake nika? Ia seken pesan ngorahang yen Tu Ngurah maan kumahne ituni lan majanji lakar buin meriki samulihne uli Surabaya," atur rabinne matadah sangsaya.
190
