Kaca:Gita Ning Nusa Alit.pdf/19

Saking Wikisource
Kaca puniki kavalidasi

apang maan masih makeloan marerasan ajak Memek, Wak, Kadek, Luh Purnama, Yan Galang, lan niki ane ngawe keneh tiange ten neh neh, denda Milah." Gusti Ngurah nolih gelanne di sisinne ane nguntul ngepes yeh mate lantas geluta. Gusti Ngurah buin ngalanturang.

"Di Padangbai kabenengan kapale ane malayar tuah kari kapal Pulau Bungin dogen. Tumben panumpange liu uli Bali ka Sasak. Uli tengah arungane ombake sampun gede. Yeh pasihe mapulek-pulekan. Lancut lan angine di pasihe banter pesan uli kelod ngaduluang kadulurin baan ujan angin. Jukung pelasane makejang ngampih buung menek. Makejang ngenggalang tuun kapasisi. Mara nyidayang megat arungan kapale mecatang malayar ngungsi pelabuhan Ampenane ane kebek yehne teked ka jembatane. Nanging lacur, mara kapale lakar malabuh saget teka ombak lan angine baret makius. Kapale nabrak jembatan lantas anyud ngaduluang nganti kampih di pasisin Menintinge. Panumpange buyar pati kaplug madukan. Buin teka ombake gede muncrat ngentungang isin kapale kapasisi. Aget ane muncalan nganti ka biase enggal tulungina teken anake, nanging ane enu di pasihe buin paida teken ombake ke tengah. Tiang sujatinne suba kampih pas mantepan di jukunge di pasisi nganti maboncol buka kene. Bendegane di sisi buin nuunang jukungne lakar nulungin ane enu di tengah. Tiang masih milu matulung bolak balik ngaba panumpang ka sisi. Nah, dugase ane kaping telu jukunge mula sarat. Buin teka ombak gede ningkebang jukunge nganti kaleleb. Tiang tusing inget apa-apa buin. Mara ngedat tau-tau suba di RSU Mataram nganti Wak ajak makejang teka. Miribang perawate maan Kartu Penduduk tiange di dompet tiange. Amun niki dogen ane kari. Barange lenan makejang hilang anyudang yeh pasihe ane ngamuk. Kapale kenken kaden, napi kari kandas di pasisi. Miribang tongos pelabuhan Ampenane mula tusing cocok, apa buin yen nujuning

13