Kaca:Gita Ning Nusa Alit.pdf/18

Saking Wikisource
Kaca puniki kavalidasi

apang malinggih, mategtegan. Nyanan jalan padingehang kenken sajanne lelakon sengkalane. Jani melahan Luh Ade ngae kopi malu." Pan Kobar nunden kurenanne apang tusing uyut. Wayan Rempuh nandan Gusti Ngurah apang malinggih di bale dangin. Made Sinar lan Luh Purnama ngenggalang ka paon nyeduh kopi patpat lan teh tatelu. Sedeng melaha Made Sinar ituni sampun ngoreng dengdeng kaok lan nguskus sukun anggon sedak kopine. Ajahan kopine sampun kasodaang. Wayan Rempuh gipih ngenterang cangkir lan gorengane. Makejang mangkin sampun nyiup kopinne suang-suang.

"Nggih dong ajengang, sampunang pabaliha gorengane. Tiang bingung uli tuni jumah padidian kilang-kileng sing nawang unduk kija pada malali."

"Saja, beli masih kamemegan ajak panake dini dugas perawate teka uli Rumah Sakit ngabarang yen ada pasien kurban kapal Pulau Bungin ane kandas di Meninting mapesengan Gusti Ngurah Darsana uli Jeruk Manis. Tambis beli sing percaya yen sing ia ngedengang Kartu Pendudukne Tu Ngurah. Sedeng melaha Luh Purnama lan Lale Dumilah teka lantas bareng-bareng ka RSU Mataram," kenten Pan Kobar nerangang.

"Nah, mangkin rarisang Tu Ngurah nyaritayang. Nanging cutetang mangda uningin sapunapi sujatinne." Wayan Rempuh makeneh enggal nawang kadadianne.

"Nggih Mek, buka raos tiange dugase lakar mulih, sujatinne tiang cuti aminggu. Nanging itelun dugas tiange malali ka Kantor Daerah BRI Denpasar sambilang nelokin Gek Sri, tiang maan surat keputusan pindah ka Kantor Cabang Atambua di Pulo Timor majumu uli tanggal satu buin limolas lemeng mangkin. Nika awananne tiang ngamaluin meriki apang maan matetamped nyerahang gagaen tiange deriki. Sajawaning nika

12