biaya rumah sakite katanggung antuk perusahaan kapale,"kenten pegawe tata usahane nerangang. Sasampune makejang pragat Gusti Ngurah, Lale Dumilah, lan Luh Purnama lantas mapamit ngojog montorne. Makejang lega, egar manahne sawireh Gusti Ngurah selamet uli panca baya. Ajahan montore magerung pesu uli Rumah Sakit, alon-alon nganginang di margane ane sedeng ramena montore kangin kauh. Teked jumah sampun peteng. Dapetanga Wayan Rempuh negak di ampike kipak-kipek tuara tau kija pada panak somahne malali sawireh tuara ada pisaganne ane nawang. Mara nepukin Pan Kobar teka lantas ia bengong, sawireh tekane katututin baan Made Sinar, Luh Purnama, Lale Dumilah, lan Gusti Ngurah Darsana atehanga baan Wayan Galang ane nyelepang montor ka garase.
"Mimiiih, Tu Ngurah ja saget rauh. Kocap aminggu, ngujang mara limang rahina saget rauh? Napi sampun kangen sareng gelane enggih?" Wayan Rempuh nguyonin saha nyledetin Lale Dumilah.
"Beeh Memek, napi kangen. Raganne kabancaran kaleleb di pasih. Niki mara ajak makejang mapagin di Rumah Sakit Umum Mataram. Syukur enggal katulungan. Kapale kandas di pasisin Menintinge dugas ujan angine itunian. Yen kari di tengah arungan kenken kaden panadianne, ....oooh?" kenten Lale Dumilah meluk saha ngurut-urut Gusti Ngurah saking rasa asih. Gusti Ngurah cemas-cemus kenyem tan pasaut.
"Mimiiih, Ratu Agung. Selamet, selamet, selamet ratu Hyang Parama Kawi, matur suksma. Kaden titiang ja sapunapi niki," sendu Wayan Rempuh saha ngelut Gusti Ngurah Darsana sambilanga ngeling saking sedih macampur bagia kenehne.
"Nah memenne, eda malu uyut buka keto. Aturin malu Tu Ngurah
11
