rabinne.
"Naah, lamun demen, onyaang suba. Buin pidan di Atambua dija ngalih bendu."
"Ten perlu kuatir mbok Ratna, lamun ngidamang bendu ngabulan lakar kirimang. Enteng, asal nyak ngentinin ongkos kirimne dogen, ha ha ha," Geg Darsini teka nyelag.
"Yen buat nika wenten Tu Ngurah bossne? Calon Aji ane sayang anak pasti ten kaberatan. Tiang sampun dot teken manggis lan apel," Ratna Dumilah kedek ngewerin.
"Ooh, sayang anakku. Aji lakar ngalihang napi dogen ane sida ben ngalih apang panak tiange ten leleh ngetel peesne," Gusti Ngurah ngusuh-usuhin oteng rabinne. Rainne makadadua kedek, rabinne makajingjangan gining. Ibunne liang pesan kayunne nyingak okanne adung maipah. Pengantene lantas ngalanturang ngopi lan ngajengang nasi goreng. Suud ngajengang Ratna Dumilah milu repot sig anake nyakan, nanging busan-busan buin ka gunung rata yen ada tamiu ane rauh. Magilihan sameton, kantenan, truna-trunine teka nelokin nganten. Makejang ngajum rabinne Jegeg, alep sebenge srengara makelus menak. Yen nabuh, basanne alus matungtung kenyem. Ten ada ngaden yen raganne anak Sasak.
Karepotane dinane nika di jeronne Gusti Ngurah mula nyrepek gati sawireh buin mani semeng babantene apang makejang pragat. Patulunge masuluran tan ngitung tuyuh, nanging masih panamiune tan tuna kopi, roko, base lan inum-inuman botolan lenan. Jam solas masakane di paon sampun lebeng. Gusti Biang Ngurah gelis maturan sodaan, jotan milehan nunas kaselametan. Salanturne lantas ngandegang patulunge magae, katurin pada ngajengang. Suud ngajengang patulung lan truna- trunine buin ngalanturang gegaenne. Ada ane ngae jaja, ada ane ngaba
132
