saputne lantas ngangge dasterne.
"Beh, aeng becatne lemah Tu Ngurah. Rasanne dereng med tiang
pules."
"Beneh, nanging patulunge ane lakar nyakan lan ngae jaja suba
teka. Mai mandus malu apang maan nganemin tamiu lan bajang-
bajange," sang kalih lantas pesu ngojog ka kamar mandi. Suud masiram
lantas maias, saha sembahyang tur matirta maening-ening.
Rainne sampun sayaga nyodaang wedang susu lan nasi goreng
mabe taluh mata sapi.
"Ngajeng malu Mbok ajak beli Ngurah sambilang ngopi. Nyanan
enggalan liu teka tamiune. Timpal-tlmpale ane masak di paon ajaka lima
makejang sampun ngopi."
"Beh, sedeng melaha pesan. Tiang mula dot makita ngopi. Bas
kakene dingine. Napi jajane Gek Sri?" Gusti Ngurah maliin piringe ane
matekep saab bora.
"Jaja Nagasari. Bendu ajak pais ada masih di paon, mara abaanga
teken brayane."
"Encen madan jaja bendu lan paise Gek Sri? Nunas bedik apang
nawang rasanne. Yen nagasari, carorot dong sampun biasa," Ratna
Dumilah nyelag saha nutug Gusti Ayu Sri ka pewaregan nyemak jaja
bendu lan pais apiring abana ka gunung rata. Gusti Ngurah sampun
ngawedang sambilanga ngajeng nasi goreng. Ratna Dumilah ngahgah
bendu lan paise. Cicipina saka bedik saha kecap-kecapanga cara
anake dadi juri lomba masakan. Mara pesu kenyemne saha ngenjuang
jempolne "Naah, niki mara jaen timpalang kopi." Raganne lantas nyiup
kopine agerosan. "Beh, yen dingin-dingin kene ngopi matimpal jaja jaen
kakene bisa tiang ketagihan terus Tu Gek Sri," Ratna Dumilah nyarere
131
