sawireh ten ngelah gegaden," Gusti Ngurah kenyem nimpalin rakanne.
"Nah, lamun kenten tiang ajak makejang sampun nunas kopi, gegaene sampun puput. Uli buin mani kari ngae jaja lan masak presmanan dogen deriki. Cawisan pebat penamiune sampun di banjar. Mangkin lakar mapamit malu, apang ten ngulgul beli Ngurah ane lesu itunian di jalanan. Melahan beli Ngurah lan mbok Ratna sirep," Gusti Ayu Ngurah ngempulin lantas pada mapamit. Gusti Ayu Darsini ngaturin raka lan ipahne apang maluan sirep. Raganne kari nampedang cangkir lan piringe ka pewaregan. Alon Ratna Dumilah kakamarne nyemak anduk lan sikat gigi. Angine dingin nyirsir ngawe raganne ngetor kadinginan, nanging dandana teken rabinne ka kamar mandi masikat.
"Oh, rasa dingine deriki patuh cara di Sembalun, nggih Tu Ngurah?"
"Ah, enu dinginan di Sembalun. Nanging yen sasih karo di bulan Agustuse mara ja dingin pesan. Yen sirep perlu masaput gebyog, nangiiiing sing perlu takut."
"Araah beli Ngurah maksudne yen penganten sing perlu takut, sawireh ... sampun ada ane dingin-dingin empuuuuk, kenten, ha ha ha," rainne ngulgul ngedekin.
"Badaaah, Gek Sri milu-milu dogen. Napinne empuk?" Ratna Dumilah macelep ka kamar mandi ngajak rabinne. Ajahan yehe sriak- sriok, pada masikat saha macanda saling sigit saking welas asih. Gusti Ayu Sri bengong nyingak cekceke di temboke saling silapin ngajak pacekanne. Padelengdeng yeh panonne eling teken dugase malila cita ngajak Gusti Ngurah di Batu Belong dugase dereng uningina raganne masameton. Pesu uli kamar mandi Gusti Ngurah kari napetang rainne kari di natahe ngamel sikat gigi.
"Oh, kenken Gek Sri, dereng masikat?" Patakonne Gusti Ngurah 126
