"Nanging Beli Ngurah ten sakit ati kapegatin tresna? Napi Mbok
Ratna sampun nawang, ten ilik yen pradene matemu teken bungan
taman Lila Arsanane miik ngalup?"
"Geg, yen saja tresna sujati boya ugi lakar dadi dengki. Salawase
tetep tresna tur angayubagia apang ane katresnain nemu bagia, maan
ane luwihan. Tresnane dasarne mula pangurbanan. Ten ada anak nyidang
ngengsapang tresna. Yen maubah dadi drengki nika madan nafsu, nagih
menang pedidi, angkara murkane mamurti. Indik ipah Geg'e niki tiang
mula ten makebangan. Raganne patut nawang mekejang. Apang ten
kagok yen matemu di jalan, utawi tongose lenan. Yen ada rahasia
amung rahasia jabatan di kantor."
"Beh, yen kenten tiang bani ngulgul mbok Ratna. Sampunang
sebet yen pradene tiang ngelantur ngomong. Bas raat raganne ngelah
kenangan suka duka ngajak truna-truni desane deriki," Gusti Bagus
Gede nyelag kapatutang teken Gede Lagas, belawan banjare.
"Nggih, kewala kanggeang tiang belog, boya ja balian sakti.
Maafang yen kari kagok ten uning tegeh endep. Tu Ngurah sampun
nerangang sami indik raganne deriki, ten sapunapi tiang dados
pelabuhan pamuput," pasaurne Ratna Dumilah alon manis.
"Nah, nika ja mara patut. Beli nyuksmayang pesan katulusan
keneh Ratnane nuduk kalacuran adin beline I Ngurah apang pakebere
ngalanglang buana prasida lancar, kebehan kampide apang adung. Keto
masih yen malayar megat arungan, apang anut dayung lan kemudine
apang ten perahune bencah," Misanne Gusti Ngurah nuturin.
"Nggih, mula kenten Beli Gung, mangkin kanggeang makeber tan
pakampid, malayar tan pabidak, asal tresnane tan patanggu, kija laku
dumadak kari ada ane ngugu. Buina yen jumah dadi petani ten ngelah
carik, dadi dagang ten ngelah modal, yen nyilih ten ada ane ngugu
125
