Kaca:Gita Ning Nusa Alit.pdf/130

Saking Wikisource
Kaca puniki kavalidasi

nyicipin lawar abange campurina putih. Lages pesan kinyukanne naar lawar. Geg Sri lan Geg Darsini seneng nyingakin ipahne.

Usan ngajengang makejang pada ngalih tongos ngisis, sajaba
pengantene ane ten nyidang pesu uli gunung rata sawireh ada
tamiu gumantinne truna-truni pasametonane ane teka nelokin saha
mragatang mayasin warung lan tongos nerima tamiune. Indik bebanten lan pawedaan pedanda makejang sampun pragat sawireh sabinaning
pawiwahan raganne lan rainne maka dadua masih lakar mapandes.
Gusti Ngurah Darsana ngenalang rabinne taken pasemetonane.
Makejang liang raket rumaket ngajum Ratna Dumilah.

"Beli Ngurah tong madaya tiang yen kancing gumi Baledane bisa anyudang blabar ngengsut di gumi Sasake di carang bungan Ratnane putih gading cayane Dumilah. Kalah bungan warsikane miik ngalup
di taman Lila Arsana ane kapiara uli nguni kasiram karabukin," Makenyem Gusti Ayu Alit ngulgul Gusti Ngurah Darsana matadah iri.

"Ah, masa dewek tiang Geg. Tiang ngepah ngantiang, ngadek bon bungane saja miik. Makita nyujuh, tegeh; tiang ten ngelah kampid.
Makita mongkod ten ngelah bayu uli semeng dereng nyampah. Paling
tiang luas ngumbara desa ngalih joan nyilih banggul, mara mulih dapetang punyan cempakane mapagehan matali lelipi gadang. Lascarya
tiang murang-murang lampah ngetut tejan bungane ening dumilah di
selaning padang kusa. Yeh matan tiange ngetel, damuh di muncuk
ratnane masih ngetel macampuh teken sayonge di Gunung Rinjani dadi riris, nuut iding, nuut tukad mabias mabatu ane lakar layarin
tiang salawase nganti teked ka segarane agung tan patepi," Gusti
Ngurah Darsana nolih rabinne, nolih bajang-bajange ane kangen milu padelengdeng yeh panonne. Ada masih ane ngarenggeng," Beh sing
ada katulusan tresnane cara Tu Ngurah."

124