dumun apang sarengina taken mantu ajak okane pada. Niki sampun
peteng, sampun jam pitu. Yen jumah lanang istri magibung ngajengang
ten kenken," kenten aturne Gusti Biang Ngurah. Gusti Ngurah ngedeng
rabinne apang bareng malinggih malingkehan ngiter gibungan sareng
pepitu. Ratna Dumilah yadiapin biasa magibung, nanging mula dereng
taen ngajengang lawar, napi malih kakomoh cara di Bali. Gusti Biang
Ngurah menekang tapan misi jukut blingbing, lawar abang lan putih ka
gibungane.
"Naah, nggih rarisang ngajengang, ten dadi kimud-kimud," Gusti
Biang Ngurah ngaturin ipen, oka lan mantunne pada ngajengang.
Makejang mabriuk pada ngajengang. Ratna Dumilah nolih rabinne
makenyem bingbang, sawireh dereng biasa naar lawar.
"Nah pelajahin nyicipin uli jukut blingbinge malu, mara urab putihe
yen takut teken anyang. Mula ada aturanne carane menekang ebe.
Uli jukut, lawar, anyang.mara timbungan, lantas sesate siduri. Yen di
Sasak komohe wadahina jembung janga di tengah gibungane. Yen di
Bali komohe dadi aba padidi-padidi," Gusti Ngurah nuturin rabinne.
"Aaah, sing kenken Ratna. Raga tumben magibung cara dini, jani
dadi dogen encen ane kademenin. Neh sate ajak timbungane penekang
Ibu. Daar suba apang wareg." Ibunne menekang sate lan timbungane.
Ratna Dumilah makenyem kimud, nanging nyud.
"Ampurayang titiang kari malajah, Ibu," aturne Ratna Dumilah
nguntul.
"Araah, ten kenken. Mbok Ratna masih ngesopin raganne padidi.
Ajeng dogen encen ane demenin, apang ten enggalan seduk." Geg
Darsini lantas menekang jukut ares.
"Nah yen niki wau cocok timpalang sate. Nanging titiang jaga
nyobak laware niki sira uning masih cocok," Ratna Dumilah lantas
123
