lacur Ibune ajak adine pada."
"Inggih sampun sami nikaanga ring Tu Ngurah. Jumah titiang
ring Sengkol taler pateh, ngrereh toya meweh. Kantun becikan deriki,
seringan wenten sabeh, wenten toya."
"Jani cening Ngurah ajak rabine sirep dini di Gunung rata. Ibu lan
Ajine depang di bale dangin. Adine depang ajak Ibu dadi akamar. Nggih
ja rarisang dumun masalinan Mbok sareng Bli Ngurah. Keto masih
cening masalinan malu, mara lantas ngajengang," kenten Gusti Biang
Ngurah lantas ngandikain panyeroane ngaba wedange ka gunung rata.
Sasampune pada melinggih Gusti Ayu Darsini ngidehang wedange
teken aji, ibu, raka lan ipene makejang. Raganne lantas malinggih paek
rakanne lan ipenne, saha makisi-kisi.
"Mbok Ratna, sujatinne tiang meled milu ka Sasak. Nanging
padalem ibu ngraga jumah ngae banten. Mbok Geg Sri kari repot
kuliah. Napi buin sasampune ada kepastian lakar mulih tur ngabarang
Bli Ngurah maan pancabaya, mimiiih ajak makejang bingung, sedih,
nanging masih angayubagia sawireh Bli Ngurah selamet. Tur mbok
saking tresna nyak nutug Bli Ngurah mulih mangkin. Tiang matur
suksma, kanggoang ngelah ipah cerik buin ten nawang napi," Gusti
Ayu Darsini ngelut ipahne saking asih.
"Nggih tiang sampun nikaina teken Tu Ngurah. Yen inget-ingetang
rasanne lucu. Makejang timpal tiange bakat cemburuin, malomba
nemenin Tu Ngurah, trunane kalem di umahne Pan Kobar. Gek Sri ane
simalu kenal dadi gelanne pamuputne raganne jatinne masemeton. Kaden
Luh Purnama utawi Made Sinar masih boya. Pamuputne yen sampun
jatu karma masih tiang ane dadi rabinne," Ratna Dumilah nuturang
patemun raganne. Gusti Ayu Sri kenyem-kenyem lek teken rainne. Ane
lingsir-lingsir masih marembug. Suud ngawedang Gusti Biang Ngurah
121