cara di Rembitan marep ka pesisin Kutane. Kewala di Rembitan tanahe
gundul tan pa toya. Yen deriki kayang di muncuk-muncuk bukita yehe
pakecorcor. Wiakti petani Baline sampun kaloktah kaluwihan pengairan
Subakne." Ratna Dumilah ngituk angob maiwasan tuun.
"Belak-belokanne cara di Pusuk. Nanging bedanne di Pusuk sisin
margane alas yen deriki carik. Nanging uli dija kaden tekan yehe niki Bli
Ngurah?" Gusti Ayu Sri masih bingung sawireh tukad Telagawajane joh
beten. Buina ten ada telabah di Rendang.
"Asal yehe niki uli Arca, ulun tukad Tlagawajane gaenanga dam
lantas celepanga ka aungane sawetara akilometer lantangne di batan
Desa Rendange mara pesu ngecokin carike gaenanga telabah uli Nongan
ngelodang teked meriki. Ane ngae boya ja insinyur nanging undagi
tukang paras lan aungan ngadu kapenteran cara tradisional Subak di
Bali. Buin jebos tingalin," Gusti Ngurah saking lenggut caritane saget
teked di margane nuunang ka tukad Tlagawaja. Buin Ratna Dumilah
bengong ningalin tukaden joh beten.
"Nah Denda, Gek Sri, tingalin yehe ngrebes uli bangkiang tangkide,
nika salih tunggil bindun aungane anggona mesuang tanah meriki.
Di duuran sisin margane ada masih bindune di Rendang. Kayang
mangkin liu anake tuun ngalih yeh minum derika. Carike ane ada
disamping pengawas Gununge nika masih maan yeh uli resan aungane"
Ten medmed Ratna Dumilah lan Gek Sri kipak ingeng salantang margane
ningalin kasuburan tanahe bek misi pamula-mulaan. Kenten masih Gusti
Ngurah tuara med nyautin patakon rai lan rabinne. Gusti Ngurah Gede lan
rabinne amung cemas-cemus ica. Saget makret montore ngerem mareren
di arepan pekene. Panumpange gageson nuunang barangne. Krenete
nerima ongkos lan nyusuk pipisne ane lebihan. Montore buin majalan
lan mareren di arepan jeronne Gusti Ngurah Darsana. Krenete nuunang
119
