Kaca:Gita Ning Nusa Alit.pdf/124

Saking Wikisource
Kaca puniki kavalidasi

Mayura?"

"Niki ane di bucu madan Krethagosa, tongos bale pengadilan jaman kerajaan maluan. Di dingdingne baduur bek misi gambar wayang ane nyaritayang Bima Sewarga lan pengadilane di akhirat, nyaritayang
karma phalane ane lakar katepuk, kayang apa panumadian jatmane buin
kawekas. Ane di tengah madan taman gili masih misi gambar wayang,
makejang mapitutur apang manusane patut melaksana ane rahayu.

Keadilan Ida Hyang Widhi ane maraga Hakim Maha Agung mula tuara
dadi tawah, tuara dadi tombok ben doa, ben pipis wiadin banten lan
bukur tegeh. Yen sampun salah agung dosa pasti masuk neraka lan patut mayah dosa hukuman di numitise buin kawekas. Yen lascarya
mayadnya, melaksana ane rahayu sinah maan swarga tur yen numitis
buin kawekas maan kebagiaan. Tuara ada swarga tumus, neraka tumus,
pasti lakar buin numitis ka mrecapada tongos iragane nyalanin karma phalane nincapang swadharmane apang nyidayang ngilangang momo
angkarane. Yen sida lepas uli suka duka, jele melah, mara madan suka tan pawali duka." Gusti Ngurah nerangang makisi-kisi. Suud ngajeng
lantas buin menek ka montore. Sopir lan dagange lenan sampun teka
lantas montore buin majalan pesu uli penambangan beneng kaja. Ratna
Dumilah nguratiang pamandangane asri di sisin jalane makelak-kelok di Bukit Jambul. Petak carike cenik-cenik makejang maan yeh, misi padi. Ane ten maan yeh misi bunga, sela, tabia, tuung, cengkeh,
lan woh-wohan lenan. Di pengkolane duuran ada pondok-pondokan
tongos anake mereren ngopi lan madaar sambilang namtamin kaasrian panoramane di Bukit Jambul marep ka pasisine kelod. Sedeng melaha
pesan sopire mareren ngisinin yeh saha ninginang mesin montorne. Liu masih penumpange tuun nguadang bangkiangne.

"Tu Ngurah ngulangunin pesan pemendangane deriki. Mirip pesan

118