Guti Ayu Sasih busan-busan nupdupang matuanne apang suud sedih
sawireh Lale Dumilah sampun lascarya kenehne nutug ane madan
tresna, tan bina cara raganne ipidan bani ngalahin kulewarga nganten
dadi mantune kayang mangkin.
Sasampune atengah jam makeber kapal terbange lantas tuun
di lapangan Ngurah Rai, Tuban, Denpasar. Masriyak galang kayunne
makejang sawireh tumben menek kapal terbang tur nempuh gulem lan
langite peteng dedet ngawe keweh kapale malabuh. Gusti Biang Suci
merasa jejeh kayunne dugase nrebak amubune tebel satmaka ngobok
gentuh di tukad ane mabatu-batu. Patuh masih Ratna Dumilah busan-
busan nekep muanne, takut. Tuun uli kapale buin menek bus ngojog ka
pintu terminal tongos nyemak barang-barange ane masimpen di bagase.
Magilir barange pesu uli lokete ane kasurung ben roda-rodane maputer
otomatis. Panumpange teka nyemak barangne suang-suang, nyocokang
nomor label barange teken ane ada di tiket pesawate, apang barang-
barange ten ada ane matukar.
Gusti Ngurah ngambil barang duenne ane liwat di arepanne.
Sasampune tegep makejang lantas penekanga ka kretane, kasorog pesu
ka tongose ngalih taksi diwangan. Rabinne, aji lan ibunne nututin pesu,
tan mari kipak-kipek angob nyingakin pirantin pelabuhane sarwa mesin
tur bresih ngulangunin. Taksine majejer ngantre ngantiang penumpang
ane mara teka. Pantes torise demen malali ka Bali, sawireh makejang
pada elah lakar kija tujuanne.
Gusti Ngurah ngaukin taksine ngorahang lakar ka penambangan
bus di Kreneng, saha menekang barang-barangne dadi duang taksi. Gusti
Ngurah ajak rabinne abesik, aji lan ibunne abesik. Sampune makejang
113
