Kaca:Gita Ning Nusa Alit.pdf/118

Saking Wikisource
Kaca puniki kavalidasi

selamet yapin budale ten papamit." Gusti Ngurah lan rabinne lantas nyakupang tangan, ngastuti.

Kapal terbange buin negehang pakeberne sawireh amubune di arepanne tebel nganti ilid. Inaq lan Mamiq Wiradana bengong nyangongak ningalin kapal terbange maceliuk hilang uli paliatne. Yeh maningalanne paseleet membah melusang pipinne ane sampun kelisut. Sedih saja kenehne tuara nyidayang nepukin pianakne luas ninggalin tanah palekadanne. Busan-busan raganne nyelsel tuara maang panakne mulih yapin ke sasiliban. Di kenehne mara nyelsel pidan kaden lakar nyidayang buin matemu ajak Lale Dumilah. Alah embot rasa papusuhanne kalaina teken kembang mata buah basangne. Engsap teken ane madan takdir yen Gusti Allah nitipang Lale Dumilah dadi pianakne, lekad uli raganne.

"Ngiring Inaq, kalahin uli deriki. Anake lenan sampun makejang mulih. Iraga mula sampun telaat ituni meriki, bas liunan papineh. Kaden tiang sampun matuinget Inaq apang ten bas sanget nuutang omongan anak len ngutang pianak. Ane kelangan masih ja iraga. Kaden mantun Inaq, Ayu Sasih masih anak len, ten ja Inaq kaberatan? Napi tuna subaktinne taken Inaq? Nguda mara adin tiange ngalih kurenan anak len dadi gedegang."

"Nah, Inaq ane pelih. Jani kenken abete apang adine tusing pedih. Kirimin surat apang ia mulih yen katuju Gusti Ngurah maan galah cuti," Inaq Wira matuturan sedih.

"Nggih nyanan tiang ngirimang surat. Lakar titipang taken timpalne di Jeruk manis. Sira nawang ada ane mulih ka Bali." Lalu Wiradana alon-alon pesu uli lapangan. Suryane sayan negehang, panese sayan ngenter, nanging kenehne Inaq lan Mamiq Wiradana kari sungsut saling salahang ajak kurenanne, srebut cara gedahe pantigang. Mantunne,

112