Artha, Ahmad, Pak Noor, lan timpal-timpalne ane mepes ajaka gradag-grudug mancing, melali lan maolah raga.
Nengah Sunia nyalanang montore ninggal kantor BRI ne katututin baan Kepala Cabang lan seksi rumah tanggane ane milu ngatehang ka Selaparang. Ajahan sampun teked di Selaparang lantas panumpange ka daftarang di loket teken Seksi Rumah Tanggane. Bukti bagasane katempelang di tiket pesawate serahanga teken Gusti Ngurah. Makejang mangkin ngantiang di ruang tunggu sambilang ngobrol kangin kauh ngajak Kepala Cabang sareng Ibu. Kapal terbange kari repot menpenang barang muatane. Jam 8.30 uli pangaloane kasiarang yen panumpange apang menek ka kapal sawireh lakar enggal terbang ka Denpasar. Gusti Ngurah ajak rabinne, muah aji lan ibunne makejang mapamit lan masalaman teken Kepala Cabang lan Ibu muah Nengah Sunia lan seksi rumah tanggane, "Silak Pak, Ibu , Nengah tiang pamit,"lantas mamargi ka lapangan.
"Nggih, selamet jalan, selamet bertugas," Pak Kepala Cabang lan Ibu menekang tanganne ulap-ulap ngatehang teked di pintu perone pagerunyung ajak pangantere lenan. Panumpange gageson pada menek ka kapal terbange ngalih tegakanne suang-suang. Aji Ian Ibunne malinggih di arep, Gusti Ngurah lan rabinne di dorinne. Pilot kapale ngidupang kapalne. Baling-baling pesawate mapiteh sayan makelo sayang cenged. Gerungan mesine magrueng banter, lantas alon-alon kapale majalan di lapangane lakar ka tengah ngungsi landasan pacune. Gusti Ngurah lan Ratna Dumilah madelokan tuun uli jendelan kapale, tepukina para pengantere pada majujuk ulap-ulap ma daag daag. Uli pintu perone ngenah belinne Lalu Wiradana bareng ajak mamiq lan inaqne masual miakang para pangantere, gageson ngarepang nganti ka tengah lapangane ulap-ulap ngaukin pianakne.
110
