surate," aturne Nengah Sunia.
"Wak, Mek, tiang pamit maluan mangkin. Buin puan ingetang ngaba barange ane lenan ajak Luh Ade. Nah Yan Galang ajak Luh Purnama tiang luas malu. Dunadak buin pidan sida matamu buin. Selegang abete magae. Eda engsap ngabarin yen lakar nganten." Gusti Ngurah nyalamin lan ngelut Yan Galang lan Luh Purnama ane nrebes yah panonne ngeling. Ratna Dumilah masih milu ngeling ngelut bajang-bajange maka tatelu. Pan Kobar lan kurenanne amung bengong, padelengdeng yah paningalanne sadih.
"Tiang sing engsap tekan kapiwelasan Wak, Mamak, Yan Galang, lan Luh pada makejang. Luh Ade gumanti apang payu pesan ja milu ka Bali. Nah tiang luas malu,"
"Inggih Tu Ngurah, Mekele Ratna sampunang lali ngirim surat yen sampun rauh ring Atambua. Elingang pasubayane sane sampun-sampun," pasautne Luh Purnama.
"Nah, keto kalahin malu pada makejang. Mbok Rempuh pidan buin lanturang yen suba di Bali. Yan Galang melahang ngijeng jumah, apang dengdenge tusing plaibanga teken meonge," kenten Gusti Biang Suci mabesen lantas medal karurunge tutuga teken rabinne, okanne lan mantune lantas menek ka montore Nengah Sunia nyalanang montore alon ka kantor BRI. Makejang nututin ben paliat nganti ilid di margane.
Di kantor Cabang Gusti Ngurah lan rabinne tuun lakar pamitan ajak pegawene. Kenten masih ibu lan ajinne milu tuun masalaman. Kepala Tata Usahane nyerahang surat-surat pindahe makejang dadi amap. Kepala Cabang lan Ibu sampun sayaga lakar milu ngatehang. Sasampune masalaman saling ngempahang kangenne, Gusti Ngurah mapamit lakar ka Selaparang atehanga teken saksi rumah tanggane. Liu pegawene sedih mrasa kelangan, gumantine Wayan Galang, Made
109
