duang doos lan madu ajirigen sampun ma pak rapi. Makejang sampun
mamerek apang elah baan ngingetin. Itung-itung ada 100 kg. Barang-
barang ane lakar maba durian masih sampun mapunduh mawadah
kardus, sokasi, karung lan barang-barangne Wayan Rempuh pedidi.
Makejang sampun mapinti di kamar tamu.
Petenge sasampune pada suud ngajengang lan madaar, pisagane
paek lan truna-truni banjare masih ada ane teka gumanti apang maan
ngorta lan ngucapang selamet jalan lakar kalahina buin mani. Lenggut
pesan reraosanne saling guyonin makakedekan nganti jam dasa. Ada-
ada dogen dadi dasar omongan ane baud nanging masih misi pitutur
jati.
"Nggih Tu Ngurah kalih Jro Mekel Ratna Dumilah, ampura tiang
ngulgul idep-idepang nelasang sisan jaja lan kopine sane dibi. Benjang
ten nyidayang ngatehang lunga. Dumadak mangda kenak, selamet
gelis madue putra. Selamet jalan," kenten raosne pada makejang lantas
mapamit budal kumahne suang-suang. Petenge amung kagalangin ben
bintang maewu. Munyin montore di margane masih sayan sepi. Bulane
tumanggal ping kutus sampun engseb. Bon bungan sandate di natahe
makesyuh, aor teken bon bungan menuh lan gambire di sanggah, saha
arum dalune kembang mayang.
Sasampune suud nampedang gelas lan cangkir kopine ka paon,
makejang lantas ngojog kamarne suang-suang. Luh Purnama nginep
masare ngajak Made Sinar apang semengan nyidaang bangun matulung
nyiapang sarapanne ane lakar lunga. Nanging maka dadua ten nyidaang
masare, kari magelut nuturang kenken mirib pengantene nemu
karasmin. Saling andeang, saling miribang, saling sawangang mabalih
klebet kenehne padidi.
"Luh Ade, kenken ja rasanne ngantene maka dadua jani. Miribang
107