nyawurin, inggih wenten werta ratu, padanda Gangga Sura, miwah I Senggu Tangi, kocapipun, antuk kuciwa pangrasa.
58. Rawuhang kapangweruhan, kuciwa antuk Pan Bungkling, kocap sadajan Sigogo, kawon tan wenten kundili, mangkin wenten iriki, soroh seleme mametuk, ipun sampun nyanggupang, pacang ngawonang Pan Bungkling dening ipun, inan seleme irika .
59. Wilang titiang becik pisan, yen sami ndikayang ngalih, punika makada kolong, ngenakin kayun I Gusti, Gusti Agung nyawurin, nah kema tunden mangruruh, kal anggon kakedekan, wus kapandikayang ngalih, tan kawuwus, Pan Bungkling sagetan teka.
9a. 60. Utusane mangaturang, puniki ipun Pan Bungkling, I Gusti Wayahan Gedot, raris dane mangawukin, mai cai Pan Bungkling, ne bawu ada kaatur, ring ida Gusti Ngurah, yan cai kocapan ririh, buwin weruh, ngalahang I Senggu Telas.
61. Jani kocap wenten selam, ne maadan Tandurahim, ia sengit uli makelo, managih manglawan cai, kenehang uling jani, pang da kuciwa masawut, krana cai kasengan, pacang metuk Tandurahim, da ja ibuk, pacang mesuang karuna.
62. Pan Bungkling raris manyumbah, titiang sandikan I Gusti, di jalane titiang kawon, apang sampun tisub weruh, soroh selam punika, yan titiang ndikayang nyangkik, nawi pelut, antuk titiang makaruna.
63. I Gusti Agung ngandika, kenken ja idep Pan Bungkling, ne jani nggawe gaguyon, mangalahang Tandurahim, kai ne nunden ngalih, Pan Bungkling raris matur, becik ratu gelisang, titiang nyandang manimpalin, nene putus, selame uli di Mekah.
9b.
64. Saget teka uli kaja, nene madan Tandurahim, iringan nyane marerod, soroh selam lan Keyai, watek ne ririh ririh, pacang mapetuk pangaweruh, rawuhe di bancingah Gusti Agung manyapatin, iba Dukuh, dini paekang manegak.
83
