26. Surya to pawakan kaja, manggawe manahe paling, manggawe pangrasa bongkok, nggawe belog nggawe ririh, nggawe darma tan sipi, nggawe bani nggawe takut, tuwi tong dadi kawan, tuwi tuah patuduh Widhi, uli malu, buka keto katatuannya.
27. Tuwi ida Batara Bulan, ida pawakan kangin, tuara ida mapilih tongos, kene papadannya cai, dijune iwasin, ada jun angan siya, makejang misi bulan, di yehe nene ening, bulan luwung, tuara ada katengan.
28 . Yen puwek yehnya, ngenah puwek butane nongosin, biyokang dadiang acepok, ngenah butane abesik, to madan langit, tong bakat baan anak ngitung, lantang pisan ucapang, buwin tan kena jaganin, nene kawuh, bapa jani ucapanga.
5a
29. Ya madan marga sanga, entasin atmane cai, apa to madan keto, laksanane sai-sai, yen beneh ban ngentasin, suarga palannya katepuk, yen pelih ban mentas, naraka bakat ceburin, tuara buwung, di jambangane malablab.
30. De ja pati mapeta, manuwukin demen ati, tuwi tuah manggawe bocok, punggel-punggelin agigis, pilih ia dadi pelih, jelene angan atepuk, dening ia nyama braya, tuara dadi manulungin, ala-ayu, pada ngalih pagawennya.
31. Wong desane nene tresna, teka di sema nututin, bawu suwud nyane morbor, lawut ia makalah mulih, ento ne pageh nututin, pagawene ala-ayu, manututin manandan, manujuin panes tis, lamun kebus, nyen anake manaanang.
32. Pan Bungkling sampun ngenehang, mangde pasawute becik, lawut ia mamunyi alon, uning titiang sane mangkin, ring madan kawuh kangin, kaja kelod menek tuwun, anging kalintang gawok, bawu titiang mamiragi, ala-ayu, marga ia miwah naraka.
33. Jujut titiang manunasang, ne mangkin ring jro Tangi, antuk titiange bas belog, mabudi mamanggihluwih, wenten ne margi malih, lenan ring margane bawu, ne madan marga sanga, yadin pet likadan gigis, malih sunut, yen sampun meleng ka suargan.
79
