425. I Dewa Gede Saloka, mangiring sang rajaputri, busan-busan delak-delok, saget nyarere kasamping, saget ada mawangsit, bas liwat cumpu ring kayun, tuara ada nawang paran, yadin wenten mangedekin, tan kalingu, dening idepe bas cumpuan.
426. Dadi mesuang babasan, kakawine wiramain, ring jalan ia manggagalok, saget ngengkelang pangawi, tembang Dandange luwih, madaging pacang pangrumrum, anake madingehang, idep nyane kadi iris, sami compu bajang saking desa Mekah.
55a. 427. I Dewa Saloka, ngengkalang pangawi manis, sumangkin tong dadi nongos, kaarep saget mamargi, tansah manolih-nolih, uli diarep di pungkur, sarwi ia nalektekang, tong maan nyingak prarai, mingkin ibuk, raris manuwunin jaran.
428. Manegag negtegang raga, madekesan kacat-kecit, prabekel sami mararyan, sami pada matur aris, punapi doning iriki, mararyan cokor i ratu, makadi yun manyingak, tan wenten nyandang iriki, nawi sedek, titiang gelisang rayunang.
429. Manawi i ratu lupa, makayun merem iriki, panese alah mangorob, titiang mangkin mangrisakin, ngebatang kalasa becik, I Dewa Saloka masawur, data petayang iba, kai nu mareren jani, keneh limuh, panese liwatang mameret.
430. Masawur I Singambara, punapi kayun sembarin, titiang taler mangrasa owon, sada mabeeng akidik, malih makadi gidih, masawang kadi mamuruh, antuk sume mamondok, babekelan be nasi, taler ibuk, antukan di padesayan.
55b. 431. Samalih cokor I Dewa, pamargine saking wengi, damuhe sada mamorot, tan wenten keni tawengin, dados medal ne mangkin, panungkane mangalimuh, manawi itunian, kasambat ring margi-margi, kalih ratu, bas tenget pisan irika.
432. Boya tenget antuk beda, boya tenget antuk jim, sane makarana sangk.awon, alase kalintang becik, asing mariki, tan wenten makayun mantuk, ulangun tan sapira, ring kalangene iriki, bas kahyun-hyun, nyandang unggahang ring karas.
130
