Kaca:Geguritan Pan Bungkling.pdf/128

Saking Wikisource
Kaca puniki kavalidasi

417. Ne teka uli di Mekah, nene mangiring i nanik, raris dane pesu epot, tan ucapan nene mangkin, patingkahe di puri, dane Gusti Ngurah Agung, miwah I Dewa Saloka, ring bancingah mangenemin, sane rawuh, tuah saking nagara Mekah.

418. Kocap Raden Lagongkoka, Raden Botoh manail, ngiring Gusti Wayan Gedot, sampun sami dane nangkil, sami manunas urip, Raden Ende Batu Karu, dane ngaturang oka, mawasta Ni Munigarin, Gusti Agung, sampun dane manarima.

54a. 419. I Dewa Gede Saloka, bawu dane manyingakin, inget saduke di pondok, duke ngandikayang nguris, wang Jagatrane sami, sing ditu kedek ngarukkuk, tuara bani maliat, sing ngiwasin pada kenying, dadi ibuk, ada ne manyelsel awak.

420. I Dewa Gede Saloka, ngandika sada aris, ne bapa suba makelo, titiang manongos dariki, ne benjang titiang pamit, dening jarahane sampun rawuh, saking Mekah, selam sami ia subakti, sami ipun, ten wenten ia pacang corah.

421. Tuara ada gawen titiang, pacang manongos dariki, Cokorda kari mangantos, I Gusti Agung nyawurin, patut titiang mangiring, ne benjang wawu saruput, pacang titiang ngaturang, sajajarahane sami, kalih ipun, Raden Ende Lagongkoka.

422. Nah yan keto idep bapa, ne I Botoh Manail, janma ia kawot makecos, ento titiang pacang ngidih, ada to buwin abesik, tunas titiang bapa Agung, yan bapa manyaratang, nunasang titiang ne mangkin, tone malu , munyin titiang anceng dogan.

54b. 423. Benjangan titiang ngaturang, ring sampun titiange polih, Gusti Agung matur alon, inggih titiang ratu ngiring, sampun angluarin tangkil, Raden Ende Batu Karu, sinamian mangiringang makadijarahan sami, sanga Ayu, miwah daha papilihan.

424. Sami lunga ka Jagatra, sampun ngalinggihin padati, ne negen marerod-rerod, kotak tabla miwah peti, mas salaka pipis, samian mawadah karung, malih kapondong jaran, rupa wenten duang tali, bek masundul, tuara ada pegat-pegat.


129