385. Sawur Raden Lagongkoka, titiang sandikan I Gusti, samalih wenten di jro, putri becik kalih siki, nunas Gusti cingakin, sameton ida sang prabu, dumara nagel roma, masawang cempaka wilis, nedeng arum, ne masawang canigara.
386. Punika nyandang aturang, dening wenten becik-becik, kalih kari anom-anom sarin Mekahe puniki, pesengan idena kalih, Nyonyah Tanu Nyonyah Arum, Gusti Wayahan Gedot, miwah Gusti Ketut Kenjing, pada bangun, mangraris ka jro pisan.
387. Sareng ken I Lagongkoka, ne mangkin rawuh ring puri, kapireng tinge masiyok, tuhu mangeladang ati, dados sareng manangis, Raden Ende Batu Karu, Raden Lagongkoka, Raden Botoh Manail, inget malu, duk kari raja di Mekah.
388. Buwin inget teken awak, jengahe tan sipi-sipi, ban tendase telah kelos, masih teka takut mati, I Gusti Ketut Kenjing, tuara dane tau-tau, dadi pesu yeh mata, pepes sampun kausapin, masih pesu, tong dadi ban naanang.
389. Luh-luhe pada ngerak, nuding I Botoh Manail, baane teka majambot, tong pantes pacang matali, mula ngodagang gumi kaicen antuk sang prabu, bas tuara nawang jengah, dadi mateman mulih, uduh lacur, tong dadi bakat andelang.
390. Ga cai dahat utama, ambulapa ne katagih, sakeneh suba-suba kamongmong, tuara taen kapindrihin, bikase sai jadig, punyah anggon agu-agu, ngaku kereng pasaja, mangetohin linggih Gusti, dadi gundul, kadi tong bani matangah.
50b. 391. Keto ban anake matbat, teken I Botoh Manail, raris Gusti Wayan Gedot, sareng Gusti Ketut Kenjing, gelis dane nyawurin, mendep ndenan nyai malu, eda pisan mnyambrahang, Raden Botoh Manail, Batu Karu miwah Raden Lagongkoka.
392. Ne anak patuduh dewa, ento tong dadi impasin enyen ja mabudi bencol, takonin pet becik-becik, dening pagaweh budi, nene jani ia katepuk, to kudiang ia melihang, yan dewane nunden jerih, ia ne takut, ia Petan tunden galak.
125
