tungin saselam-selame ditu, to masa belog bapa, tekaning tunden nyarahin, pacang katur, ring ida cokorda Singa. 370. I Gusti Wayahan Tuban, nah kema majalan mulih, tekane ditu di jumah, enggalang cai macawis, patamiyune apang becik, bapa mani pacang mantuk, ngiring I Dewa Saloka, panjake matatu mati, tunden nuduk, apang watra ia ngapisan.
48a. 371. I Gusti Wayahan Tuban , sampun malipetan mulih, I Dewa Saloka ka pondok, I Gusti Agung mangiring, tan caritanan wengi, panjak Gusti pada liyu, medem pada di pondok , benjang semengan matangi, Gusti Agung, miwah I Dewa Saloka.
372. Panjak sami kabudalang, sawenten ipun mamargi, I Gusti Agung magayot, prabekel pada manyanding, sampun majalan sami, ring bandingan sampun rawuh, liyu pada mamendak, luh-luh kundang mamendak , pada muwug pada manakonang orta.
373 . Sarawuhe di bancingah, I Dewa Saloka malinggih, Gusti Agung rawuh nyongkok, sambil mangaturang bakti, prabekel panjak nangkil, ring pungkur I Gusti Agung, I Dewa Gede Saloka, ngandika sambil kenying.
374. Sapa sira malih nyandang, pangandikayang mangraris, Gusti Agung matur alon, banggayang titiang iriki, durus malinggih Gusti, puniki kalah iratu, sami pianak titiang, banggayang ipun manangkil, keni ratu cokor idewa uninga.
48b. 375. I Dewa Gede Saloka, malih ida manyawurin, amnguda sih bapa keto , melah menekan malinggih, sampun sami malinggih, punggawa sami di pungkur, panjak betenan manegak , Gusti Agung ngandikain, Tambak Gangsul, miwah cai Alit Soka.
376. Panjake pada budalang, keliang endek dini, panjake uli johjoh, pada masanguin pipis, nene matatu mati, baang pipis pada nyiwu, cai nagih di jumah, pada malaksana mati, pang da ibuk, kurenan nyane ngitungang.
123
