gajahe tuara ada belur, teka sumangkin galak , I Dewa Saloka ngucupin, raris nulup, gajahe mati nyulimpang.
332. Dening upas melah pisan, ento kaanggon nibakin, ia I Sura Dilaga. ia bareng mangemasin, wang Mekahe tan ajerih, masih ia naregteg ngamuk, pada tuara kaadan, kaget matulu di dori, Gusti Agung mangamuk krura manduak.
333. Wang Mekah mabiyayuhan, bane kamuk uli dori, dadi ia mawetu angob, lilihe tuara manolih, majekjek saling tigtig, katumbak kena manduwuh, buwin kasempal-sempal, kabeet baan gagitik, len kagebug, bangkene buka punduang.
334. Raja Mekah lintang kagiat, mabikas marep kaori, sareng teken I Mas Anom, kairing baan babisik, dening ia kakibulin , pada maarep ka pungkur, sambil malikang panjak, ne di arep suba lilih, pada gelu, bane bakat kibulinnya.
43b. 335. Jani suba tatas lemah, matanding pada becik, panjak tuara kena tagok, sepanan ndabdabang malih, I Gusti Ketut Kenjing, mangepung uli di malu, ngiring I Dewa Saloka, raja Mekah ida mangkin , kadi tambus, tan wenten maduwe pangrasa.
336. Ngamuk ngalinggihin rata, sambil nyolahang paresi, tong bisa ingen manongos mangamuk mamuat-mait, pedange kadi tatit, cetang kaja cetang kawuh, ida raja di Mekah, kabangan mambuh ban getih, dening liyu, musuhe kena kasempal.
337. Getih nyane pasamburat, ia dadi manjus ban getih, kaliwat pada kagawok, masawang api nikelin , Rahaden Citra Rukmi , Citra Guna I Mastrakul, ngamuk negakin jaran, manglawan tuara nyirikin, sing kacunduk, katujuh mati kapanah.
338. Len kasepeg ban pedang, wang Pamamorane lilih, I Gusti Wayahan Gedot, kaarep nguyeng gagitik, Gusti Ambuak nyarengin, mapagut teken I Mastrakul, miwah I Prokoseng Perang, matanding lawan Pan Bungkling, bah macebug, Pan Bungkling ken akatujah.
44a. 339. Nanging sada manyalampar, edasan kena keludin, yan tan Gusti Alit Saloka, manyagjag gati nulungin, katumbak betel katun
118
