Kaca:Geguritan Pan Bungkling.pdf/100

Saking Wikisource
Kaca puniki kavalidasi

26b. 199. Bareng ring I Linga Krura, patpat kocap pada luwih, pajalan sikepe gongsor, tan pegat-pegat di margi, mairib gentuh api, macebur uti di gunung, sikepe pakulelam, len tunggul tuara wilangin , kadi andus, bareng teken lalatunnya.

200. Tan caritanan di jalan, pajalane lemah wengi, Gusti Agung rawuh reko, sampun dane polih kanti, malih dane katangkil, i dewa Saloka wus rawuh, sampun kapasanggrahan, pepek patamiyune becik, tan kawuwus, kocapan i raja Mekah.

201. Ngandika teken punggawa, ene iba Citra Rukmi, Citra Guna I Mas Anom, kema majalan tangtangin, Jamunnya nunas urip, lega atin kai ngawuk, manyuang panak somah, yan tuara ma- . nunas urip, dadi tepung, I Agung di Pamamoran.

202. Utusan sampun majalan, prayatna nene mangi.ring, tuara ada jadma belog, soroh kedat kapilihin, pada tanana ering, pejalane pada nawus, ngojog ka Pamamoran, tuara ada anak ngempetin, ia manglawut, sampun rawuh di bancingah.

203 . I Gusti ngandika, ne cai uli dija mai, pajalane sada encong, utusan gelis nyawurin, bangras adeng mangatih, titiang mariki kautus, antuk raja di Mekah, maneteg kayun I Gusti, lamun purun, gelisang medal mayuda .

204. Suwe sampun titiang, makayun pacang medalin, kangkat ida ngantos-ngantos, yen I Gusti pinda jerih, becik manunas urip, aturang ja pamintuhu, yan boya sapunika, becikan pianak rabi, pacang katur, ring ida raja di Mekah.

205. Gusti Agung Pamamoran, dereng dani manyawurin, kari mangitehang rawos, mangde pasawure becik, Gusti Kancana Sari, sareng Gusti Tampak Gangsul, Gusti Wayahan Tuban, raris dane manyawurin, buka busbus, munyine tuara majangka.

206 . Ne iba pada utusan, mai gelap mangajahin, I Gusti bakal mangawon, buwin nagih pianak rabi, yen iba pisan bani, enggalang jani mangamuk, kai nandingin iba, ne pisan pilihin, uli tundun, paet panga cekah-cekah.

101