Kaca:Geguritan Mladprana.pdf/99

Saking Wikisource
Kaca puniki kavalidasi

95

2. Mangda sweca bapa luas ka Wanapuspa, ngarsang Ni Jangga Ketaki, ring bapa Gede Taman, mangda sida ugi titiang matmu ring Jangga Ketaki, nah suba srahang, mangda yang ditu manjakin.

3. Yan tan sida antuk bapa matemuang, titiang ring Jangga Ketaki, sukayan, makadi titiang, matinggal satiba para, roaring luwah wana giri, nglebok samudra, sukayan titiang ring mati."

4. Raramannya gelis manyanggra mangucap, "Da cai nglalu pati, sida bahan Bapa, masa ko tuara kasidan, yan Bapa kema namakin, sinah ya kaserah, tuara ia bani nulakin.

5. Nah, ne jani cai nongos jua dijumah, Bapa luas kema ngidih." Ngararis mamargi, tan kocapan ia di jalan. Sampun rauh sane mangkin, ring Wanapuspa, jumah Gede Taman wiakti.

6. Tan kocapan puput pakarunan ira, I Rudita kaorahin, "Sida antuk Bapa, buin mani cai kema, tongosin ia adin cai, Bapa ngitungang, duasa pawarangan becik."

7. I Rudita kenyem tur alon angucap, "Titiang pitelas mangiring. Wenten pinunas titiang, papending gelang kana, sasimping lan skar mas sami, buat titiang mrika." "Nah to sara suba cai."

8. Tan kocapan wengi benjangnya caritang, semengan raris mamargi, tan kocapan di jalan, ya I Wayan Rudita, ring Wanapuspa parapti. I Gede Taman, manyapa madulur krnying.

9. "Cening Rudita semengan ko cai teka." I Rudita manyaurin, "Inggih rauh titiang, mangkin titiang mitulusang, bawos gurun titiang dibi, sweca jwa Bapa, marekang titiang ne mangkin.

10. Tur nuturin tingkah patut dados jadma, eda ngubda nglemeking." I Gede Taman angucap, "Da cai liu satua, Bapa suba dadi abesik, ring bapan wayan, nah dini suba ne jani.

11. Nah bisayang dewek caine manyama, tekenin ya adin cai, idihin ia ayah, rawosin di pedeman, mangdane ia dadi asih, raket masomah, tutut mangidepang munyi."

12. Kacutetang aketo pitutur ia, raris dane ngandikain, "Wih Jangga Ketaki, mai nyai jua paekang, baang base belin nyai." Raris ia prapta, mangenjuhang pabuan aris.