Kaca:Geguritan Mladprana.pdf/174

Saking Wikisource
Kaca puniki kavalidasi

170

niki kadi titiang, tan marenan, jengah lara kaprihatin, pacang nywita ring Sri Nata."

LIII. PUH SINOM

1. Sampun pupute manyurat, ngandika ring Ulasari , "Nah kema jani majalan, alas Suradwipa ungsi, teked ditu ngungsi kangin." Ni Ulasari lumaku, sampun sire surup surya, rauh ring alase mangkin, tur manerus, pamargine nyusup alas.

2. Kadahatan rungka pisan, tan kocapan Ulasari, I Mladprana kacarita, pageh matapa ring gili, jala wengi sunia sepi, Sang Hyang Ludra mangkin rauh, ngandika ring Mladprana, "Nah apa pisadia cai, dini nglalu, mlebok di tengah samudra."

3. Mladprana maliat ngawas, pedasin twara kapanggih, raris dane matur nyawang," Sira jwa ngandika niki, pinunas titiange luih, mangda mangasorang satru, saha danur weda sastra." Hyang Ludra ngandika aris, "Uduk kamu, manusa liwat utama.

4. Ingong iki Sang Hyang Ludra, jani ngalugrain cai, panah cenik ringkes buat, ngarania Ki Maya-geni, asing kena sida mati, yan meweh kakwehan satru, yeki regep ngawijilang, detiayaksa luih sakti, nyandak satru, muah sakancan wirosa.

5. Puput ida ngalugraha, suksma Hang Ludra mangkin, I Mladprana langkung bingar, semengan laut kasisi, amurang ngulon mamargi, Ni Ulasari kawuwus, mamarga twara rerenan, lin tang alas sampun lingsir, tur kacunduk, I Mladprana ring marga.

6. Ring wau mapapas liat, mlengok ia Ni Ulasari, ngantenang I Mladprana, pangid bagus tan patanding, kimud nuunin nyapatin, nyamping slimped laut labuh, binjul I Mladprana ngucap, "Nguda dadi sakit ati, sayang alus, ragan jero mapantigan."

7. Turin dane manangsekang, mangenang ditu ngedetin, tur matakon kenyung ngucap, "Nggih ragane saking napi, napi pisadiane mai, ragan luh ndewek ngalalu." Ni Ulasari angucap, midartayang punang indik, puput nutur, I Mladprana nimbal ngucap.

8. "Inggih titiang jwa manyama, maring Ni Janggaketaki, ragane ngangken putusan, engken cirine sujati." Ni Ulasari ngenjuhin, surate teken ing bungkung, I Mladprana narima, surate nuli wacenin, maring kayun, lintang ngumandelang pisan.

9. Raris dane mangandika, "Duh nyai Ni Ulasari, jalan ne jani matulak."