Kaca:Geguritan Mladprana.pdf/173

Saking Wikisource
Kaca puniki kavalidasi

169

ngawag nyen nyamane." Ni Ulasari sumawur, "Sampunang sangsaya gusti, ditu masa tambet titiang, titiang bakti saking nulus, yadin adoh selat alas, titiang ngentap, gelisang makarya tulis, Ketut Oka raris nyurat.

8. "Duh puniki bungkung susiahati satmakannya, titiang marek ring ida, makelingang wit tresnane, ban mangkin bli pageh kantun, mangda sampun ratu lali, ring baktin titiange suba, diapin madohan lungguh, mangda sampunang i dewa, nampi titiang, rered bakti ring i gusti, titiang manggeh kari tresna.

9. Diapin ratu jani tan eling ne ring titiang, kadurus muikang, twara ngitung pitresnane, yadiapin ratu tan cumpu, tan surud titiang ngulanting, yadian mahadohan genah, manah titiang suba ditu, jati atmajiwan titiang, twara belas, ring i ratu neket sai, ban nginggil sinah taresna.

10. Diastu ping sapta manumadi dados jadma, manga makaronan, malih elingang tresnane, rakete kadine sampun, ban tresnane nekeng ati, ne mangkin titah batara, melasang titiang ring atu, krana tresnan atu pasah, teken titiang, pegat rampung tanpa nolih, rasa tong marawat matra.

11. Nah lagute ada suba uani ne melahan, pangantungan cita, ne nglangenin kayune, da kuda pegat rampung, elen-elen manyebengin, elingang malih amatra, baktin titiange ne sampun, twara taen mrasa obat, nerus pisan, tong kesahanan akidik, manggeh bakti saidupan

12. Amunika manah titiang subakti leket tresna, sungleng ring i dewa, bani ngetohang angkiane, sapakayun titiang tinut, prade masih ratu jani, ngapus ngalinyokin titiang, di arep makuma takut, nglucu rasa tutut tresna, tlektek awas, ratu ngimpak ngelen aksi, ngardi sakit manah titiang.

13. Yan tan sapunika kayun gusti ne ring titiang, nguda jeg serahang, teken Ni Dukuh Saktine, tur katur maring sang Prabu, ring jagat Pratana iki, ratu truna sang Nirnaya, kueh bala sugih bagus, pacang jua panjakin titiang, titiang twara, nyadia nadwin nawang muani, eling wantah ring i dewa.

14. Sapunika awinan titiang ne mangkin manawegang, yan wantah i dewa, kari amatra kayune, eling kadung ajak lacur, rereh titiang jwa mariki, yan i ratu cepung elas, titipin ja titiang bungkung, sane di kacing kanawan, ciri bebas, titiang jwa mapamit mati, mati tresna takut palas.

15. Ri wekasan mangda sareng turnitis dados jadma, nggih pinunas titiang, ring Sang Hyang Uma-sritine, mangda nyaksinin mituduh, mangda titiang dadi muani, i ratu dadi luana, mangda mangguh sakit kayun, sapu-