147
angupas, Rutita Dustaka kena, lesu dane paremangkin, nyakitang basang, peluhnyane paturibis.
9. Tur manuwuh, "Aduh Ni Warsiki teka, mai manyelepin ati." I Dustaka nimbal, nuwuh ngeling naen basang, "Aduh Ni Jangga Ketaki, macelep ka tengah, kenken juwa kudiang jani."
10. Saling timbal duwuhane padadmanan, blasak uyang liwat paling, kebus bara pisan, gamulisah makyayangan, patikaplug saling lukis, sawusan nguyang, memanting lawut manengil.
XXXVII. PUH MIJIL
1. Ditu ngajang sisiane nyakitin, kadudonan ngerong, Nilapaksa lan Raktakujane, nawut sabda miwah nawut ati, nglesang baju kancing, sane magenah ring suku,
2. Swetagana miwah Ni Sugandi, nawut idep reko, tur sahasa mangambil amprune, Pancapuspa Sungsangjenar neki, nawut bayu kancing, nering pukuh karna iku.
3. Tur manguyup bayun nyane sami, ngepus punang limpa, tur sahasa menektek basange, lan paparu sami jwa kabisbis, mangalantas mati, Dustaka Rudita iku.
4. Sampun pejah tur kapunggal nuli, Dustaka Rudita, tur kabakta nemangkin ulune, nuli mesat miber sareng sami, tan crita ring margi, saget mangkin sampun rawuh.
5. Sareng sami nangsekang malinggih, maring I Mladprana, matur "Niki wantah punggalane," I Mladprana tumuli mangaksi, ulu kalih siki, lintang rena maring kayun.
6. Tur ngandika, "Dewa sareng sami, jati saking srusa, kalangkungan buat pitresnane, tan amitya dewa sareng sami, nggih durusang ugi, suwecane mapitulung."
7. Punang sisia matur sareng sami, "Nggih titiang pucukang, nggih pagutang ring Dukuh saktine, yaning durung telas punang urip, titiang areng sami, sampunang gusti lumurug."
8. Sapunika atur sisia sami, pada makusara, purun magut Ni Dukuh saktine, sami nyadia pada metoh pati, tan wedi ring pati, nindihin Mladprana iku.
