133
2. Miwah boktah bareng ngamah minum sai tekan corah, sacarakah muwah, bareng teken selwan maling, pritikah aran puniku, makakasihan
ring maling, astanadah maweh genah, tritah yaning matulung, teken sahananing corah, makamiwah, ane madan Sadtatayi, tatasang jwa dingehang.
3. Angrowana angleyak neluh manesti naranjana, Astrobyatakara, angamuk anak tan sisip, Wisiadah nyetik ngaracun, Acewah yan dratikarami, Agnidah muwunang umah, ngraja pisuna puniku, misunayang gustinya, to makejang, pelaksanannyane pelih, Sang Hyang Gama mamidanda."
4. Pancapuspa makemiwah Mretawati nyangga mojar, "Da dewa langgana ,
kangen titiang ring i gusti, mangda ratu panjang tuwuh, serahang Jangga
Ketaki, mangkin buat titiang tulak, titiang ngaturang panuku, manik
madulur mas mirah, sapakarsa, titiang ngaturin i gusti, mangda tulus
sami yuwana."
5. I Mladprana masawur sada kenying, "Dong ja mula, pacang anggon dagangan, ngalih somah pacang tresnin, misadia ngetohang angsur, yen
sarat atine meli, beli ban tendas adasa, tendas sisiane papitu, kutus tendas I Rudita, kaping sia, ulunnya Ni Dukuh sakti, adasa tendas Dustakara.
6. Yan tan ika anggon pacang meli mangdoh bakat, nagih ngedih numbas,
tuwi silurin ban kakalih, kalih pentes mangaluku, bajang cerik buka
jani, mimbuh mas selaka mirah, tong dugi antuk masilur, silur manike
ban timah, yan upamiang, bulan bintang matan ai silurin ban kunang-kunang.
7. Diastun kuning dipta sunaran makenyit akenyitan, abesik gunanya,
ngawe besuk kala latri, letre dadi tanpa bayu, letre dadi tan pabayu,
baya yan nto tresnanin, waluya ngaracun awak, kadi Watakwaca iku,
kaupaya ban Hyang Indra, tulus pejah, kadaropon kena manis, Supraba Parta dinuta.
8. Nah keto upami yan nyai dini mlahan tulak, da nelukang awak, nelek
deweke sasai, bane byai patiluplup, leplep keneh ngaleplepin, culup
calep kacelepan, tan wangde manggih pakewuh, reh manahe lintang galak, kadi mina, ngamah baren misi pancing, luir paksi keneng pikat."
9. Pancapuspa tumuli nyawurin bangras mojar, "Lek ati matulak, yan
tuara angan kanin, ban ibane liwat ngagu, ngugah ngagah ati runtik,
runtike pacang tilara, ngelarin jajah papusuh, bani bane jejeh pasah,
krana wenang, gela-gela apang ngrigis, ngareges mati ska lawas."
